Gutxienez bederatzi migratzaile hil dira ostiral gauean El Hierro uhartean (Kanariak, Espainia). 84 pertsona zeramatzan txalupa bat hondoratu da. Itsas salbamenduak bederatzi gorpu berreskuratu ditu, eta 48 desagerturen bila ari da. Okupatzaileetatik 27k bakarrik iraun dute bizirik. Itsasontzia irauli egin da erreskatatu behar zutenean, kostaldetik zazpi kilometrora.
Ontziko bidaiari guztiak gizonezkoak ziren. Kostara gerturatzen ari zirenean, motorrik gabe geratu ziren. Zehaztu dutenez, haiek eman zieten abisua larrialdi zerbitzuei, eta erreskatea 03:00 aldera gertatu zen.
Bart hiru txalupa iritsi ziren El Hierrora eta beste bat Lanzaroteko uhartera, eta 157 pertsona zeramatzaten guztira. Beste ontzi baten bila dabiltza.
Orain arte, Kanarietan dokumentatutako ezbeharrik handiena Los Cocoterosekoa (Lanzarote) izan da, 2009ko otsailaren 15ean gertaturikoa. 25 pertsona hil ziren.
