Kataluniako Justizia Auzitegi Nagusiak kautelaz eten du Kataluniako hezkuntzako hizkuntza araubidearen dekretua. Horrela, onartu egin du Eskola Elebidunaren aldeko asanbladak aurkeztutako helegitea. Oraindik, ordea, auzibidea zabalik dago, eta Kataluniako Gobernuak helegitea jar dezake.
Dekretuaren helburua eskolei «segurtasun juridikoa» ematea da, eta bertan jasota dago katalana dela noramalean irakaskuntzarako erabiliko den hizkuntza, baita etorri berriak diren ikasleei ongietorria egiteko erabiliko dena ere. Gainera, aipatzen du hizkuntza horretan aritu beharko direla eskolaz kanpoko jardueretan, baita hezkuntza komunitatearekin harremanak edukitzean ere.
Kataluniako Gobernuak dekretu hori eskolen %25 gutxienez gazteleraz egiteko aginduari aurre egiteko onartu zuen. Orain baina, Vilaweb hedabideak jakin duenez, epaileek ebatzi dute arau horrek oinarrizko eskubideei eragiten diela, katalana eta aragoiera soilik ezartzen dituelako irakaskuntzarako hizkuntza gisa, eta ez duelako bermatzen irakasgaiak gazteleraz jaso ahal izatea.
Euskalgintzaren Kontseiluak ez du begi onez ikusi epaitegiaren erabakia: «Epaitegiek hizkuntza politika aurrerakoiak baldintzatu nahi dituzte».
