Italiako lehen ministro Georgia Melonik ez du amore eman; kontrara, auzitegiei izkin egiteko modua aurkitu du. Gaur eguerdian iritsi da Albaniako Gjader herriko zentrora Italiatik bidalitako laugarren migrante taldea: 40 pertsona. Oraingoan, baina, migratzaile horiek guztiak ez dituzte Italiako kostazainek Mediterraneo itsasoan atzeman; Italiako zenbait deportazio zentrotan zeuden, beren asilo eskaeren ezezkoa jaso ondoren. Italiako hedabideen arabera, bangladeshtarrak, aljeriarrak eta tunisiarrak dira.
Albaniak eta Italiak egindako akordioaren arabera, hasierako helburua zen Italiako kostazainek Mediterraneo itsasoan aurkitzen zituzten migranteak Albaniara bidaltzea, eta horiek guztiak Gjaderko zentroan izatea, Italiako agintariek beren asilo eskaerak kudeatu bitartean. Duela bi aste, ordea, Melonik eta haren taldeak dekretu bat onartu zuten, zeinak baimentzen duen Albaniako zentroa migratzaileak deportatzeko zentro gisa erabiltzea, eta Italian modu irregularrean dauden migranteak hara eramatea, ondoren handik sorterrietara bidal ditzaten.
Ikusteko dago trikimailu horrek funtzionatuko ote duen; izan ere, Erromako Auzitegiak bertan behera utzi ditu Albaniara egindako aurreko hiru bidalketak, eta Italiara itzularazi ditu hara eramandako migranteak; besteak beste, batzuk osasunez «kaskar» zeudelako, beste batzuk «oso zaurgarriak» zirelako, eta, oro har, migratzaileen sorterriak ez zirelako «herrialde seguruak».
