Ipar Dakotako (AEB) zinpeko epaimahai batek ebatzi zuen, atzo, Greenpeace erakundeak 665 milioi dolar —613 milioi euro— ordaindu behar dizkiola Energy Transfer enpresari, horren aurka antolatutako protesta batzuetan «bandalismoa» eta konpainiaren «difamazioa» sustatzeagatik. Energia enpresak oliobide bat eraikitzeko lanak hasi zituen 2016an, Ipar Dakota iparraldean, hainbat komunitate indigena bizi diren Standing Rock izeneko erreserban; konpainiaren asmoek, baina, haserrea eragin zuten komunitate indigenetan, iritzita proiektu hori «lur sakratuetan» eraikitzekoak zirela, eta «arriskuan» jar zezakeela komunitate indigenen ur hornidura.
Energy Transferren aurka egiteko, Standing Rock komunitateak —hainbat tribu indigena biltzen ditu— kanpaldi bat egin zuen oliobidea eraikitzekoak ziren lur eremuan, Greenpeaceren babesarekin. Hainbat hilabetez iraun zuen kanpaldiak, eta denbora tarte horretan liskarrak izan ziren manifestarien eta Poliziaren artean, zenbait lagun atxilotu eta zauritzeraino. Protesta horien ondorioz, Energy Transferrek atzeratu egin behar izan zuen oliobidearen eraikuntza, eta handitu egin ziren proiektuaren kostuak. Horiek hala, energia konpainiak salaketa bat jarri zuen Greenpeacen aurka.
Gobernuz kanpoko erakundeak behin baino gehiagotan ukatu ditu bere aurkako akusazioak, argudiatuta protesta horiei babesa eskaini zien arren ez zuela «inolako» zerikusirik izan haien antolakuntzan. Ebazpenaren berri izan ondoren bere webgunean idatzitako testu batean, Greenpeacek leporatu dio Energy Transferri AEBetako sistema judiziala erabiltzea erakundea «isiltzeko»; are, GKEak ohartarazi du gisa horretako zigor ekonomiko batek «50 urteko ibilbidearen amaiera» eragin dezakeela.
