Australia hegoaldean, Tasmania uharteko hondartza batean 157 zetazeo agertu dira gaur, ur ertzean. Horietatik 90 bizirik zeuden fauna babesteko langileak eta albaitariak iritsi direnean, baina hil egin behar izan dituztela jakinarazi du Tasmaniako Ingurugiro Departamentuak ohar bidez. Baldintza meteorologikoen eraginez, albaitariek ezin izan dituzte animaliak berriz itsasora eraman.
Oharraren arabera, zetazeoek orka beltzak ziruditen, pseudorca crassidens espeziekoak.
Aurrez ere izan dituzte antzeko egoerak Tasmanian. Egoera horietan bezala, Ingurugiro Departamentuko langileek ez dakite zer dela-eta iritsi diren zetazeoak irlaren ipar-mendebaldeko hondartza horretara. 2020an, 470 zetazeo iritsi ziren Tasmania mendebaldeko hareatza batera, eta horietatik ehun inguru atera ahal izan zituzten bizirik. 2022an, 230 balea agertu ziren, berriz ere uhartearen mendebaldean, eta erdiak hil egin ziren.
