Kiribil itxurako ibilbide bat egingo dugu. Belaustegiko kokalekuak eskaintzen duen altuera profitatuko dugu Gorosteta eta Oderiagako tontor nagusietara igotzeko. Bigarren mailako beste mendi pare batetik kateatuko ditugu, Ipergortatik (1.235 m) eta Usotegietatik (1.187 m), hain zuzen ere. Kontuan hartu behar da, batetik, igo eta jaitsi bitartean desnibela pilatzen dela, eta, bestetik, bidezidorretik kanpo bi zati daudela, lur ezegonkorretatik doazenak.
Ibarra auzotik, Orozko inguruan, Urigoitirainoko bideari jarraituko diogu. Ugaldeko baserrien parean, Belaustegirantz eramaten duten seinaleen ondoren desbideratuko gara. Errei estu batetik basoak zeharkatuko ditugu, eta Belaustegiko aparkalekuan amaitzen diren bi aldapak igoko ditugu.
Aparkalekutik, Austiarmin aldera doan pistarekin bat egingo dugu, pinuz eta izeiz osatutako baso geruza trinko bat zeharkatuz. Emeki-emeki igo, eta ezkerretara Sintxitako amildegi sakona barnebiltzen duen pagadia hazten den zonara iritsiko gara. Basotik, mendi soil batera irtengo gara, zeinaren belardi berdeen gainetik Oderiagako gailur zabala altxatzen den. Ukulugortarantz seinaleztatzen duen idazkun bat eskuinean utziko dugu —handik itzuliko gara—, erreka bat zeharkatuko dugu, eta igoera pistaren trazadura zabaletik gora egingo.
Batzuk besteak baino malkartsuagoak diren malda ilara batean zehar, mendi lepo baterantz igoko gara, ezkerraldean Sintxitako amildegi basotsuaren gainetik altxatzen diren Itxinako kubeta karstikoaren mendebaldeko hormetara ikuspegi ederrak eskaintzen dituena. Gehiago luzatu gabe, mendi lepora iritsiko gara, zeinean bidegurutze bat eta hainbat idazkun dituen zutoin bat topatuko ditugun.
Gorostetako balkoi harritsura
Dauden bide guztiak alde batera utziko ditugu, ezkerrera egin eta, bidezidorretik kanpo, Austiarmin gain txikira igoko gara, belardi eta armazoi harritsuen multzo batean barrena. Goitik, Orozkoko haranaren eta Arratiako domeinuen ikuspegi zabala izango dugu. Gailur txikia zeharkatu, eta eskuinetik inguratuko dugun erlaitz batera iritsiko gara, eta ezkerretik gaindituko dugun eraikin handi batera iritsiko gara. Jarraian, bidezidor batekin bat egingo dugu, zeina ezkerraldetik jarraituko dugun, goranzko norabidean.
Pixkanaka malda gogorra gaindituko dugu, zeinak erreitik barrena Ipergortako Pasabidera eramango gaituen, eta kontrako muturrean Gorbeia mendiaren irudi bikaina agertuko zaigu. Han, bide zabala utzi, ezkerrera egin, eta belardian gora igoko dugu muino txikia, Ipergortako bigarren mailako tontorrean eta bere orientazio mahaian amaitzen dena.
Tontor horretatik haratago, Itxinako lurraldeak ikusiko ditugu, Lekandako goragune handiena albo batean dutela. Hurbilago, eskuineko muturrean, Gorostetako tontor harritsua begien aurrean agertuko zaigu. Belardian behera metro batzuk egin, mendi mazela txiki bat igo, eta Gorostetako gailur harritsuaren oinarrira ailegatuko gara. Gailurrera iristeko, haren lapiaz karstikoaren zoru irregularra gainditu, aurreneko goragune bat igaro eta bigarrenarekin bat egingo dugu, zeinak postontzi bat duen. Handik ikusiko ditugun ikuspegiak zinez harrigarriak dira, batez ere Arrabako belardien eremura zein Gorbeiaren iparraldeko magalera begiratuta.
Oderiagako bidea
Bide beretik Ipergortako Pasabideraino itzuli, xendra zeharkatu, eta maldan behera abiatuko gara, eskuinera pixka bat eginda, pagadian murgildurik dagoen labirinto harritsuan zehar pasabiderik egokiena bilatuz. Lehenengo eremuak hainbat pasabide ditu, tamaina handiko arroken artean, eta zenbait puntutan pixka bat eskalatu beharko dugu. Oso lur malkartsua da, eta kontuz ibili beharko dugu arroken artean dauden pitzadurekin.
Mendi hegalaren bigarren zatian, ibiltzeko errazagoa den lursail bat topatuko dugu. Berau zeharkatu, eta harrizko mugarriz markaturiko GR 282ko balizak aurkituko ditugu, pagadia eta haren harkaitzak libratzeko orientabide gisa balio digutenak. Hala, eskuinaldetik, Azaolako Atxa eta Atxabalako Atxa tontorrak inguratuko ditugu, Usotegietako zuhaitzik gabeko gailurrerantz behin betiko igoerari ekinez, zeina Urduñako eremurantz eta Salbada mendilerrorantz baranda ederra bihurtzen den.
Gailurrean sartu ahala, eskuineko hegaletik jaitsiko gara bidezidorrarekin bat egin arte, berau eskuinetik jarraituko dugularik Austiarmin mendi lepoaren aurreko punturaino, non pista batean bilakatzen den. Leku horretan ezkerretik irtengo gara, hogei bat metro aurreratu, eta ezkerraldetik Argindegortako muinoa inguratzen duen bidezidor batekin bat egingo dugu, Oderiagara igotzeko xendraren norabidean, aurretik Usotegietatik ikusi duguna.
Bidexka zelai batean desagertzen denean, gurutzatu eta arestian aipatu xendrarekin bat egingo dugu, eta ezkerretik jarraituko dugu, gorantz. Oderiagako hegoaldeko hegalaren igoera oso malkartsua da, eta zenbait izkin eginez gaindituko dugu. Bidexkak gailurra inguratu eta beheranzko norabidean luzatzen denean, alboan utziko dugu eta eskuinaldetik igoko gara ehunen bat metro gailurreko mugarri handi bateraino, Oderiagako erpin geodesikoa duten arroken aurretik dagoena.
Belaustegira itzultzea
Gailurretik, berezko mendilerroa iparralderantz jarraituko dugu, eta, aurreneko tontor bat gaindituta, ezkerreko mendi mazela zeharkatzen duen bidezidor bat aurkituko dugu, Egilleor gailurraren aurreko leporainoko beheranzko norabide argiarekin, zeinaren inguruan artzain bordak topatuko ditugun. Mendi lepoan eskuinera egin, eta erlaitz bat saihesteko eskumaldera atxikita jaitsiko gara, pagadiruntz. Hara iritsitakoan, sigi-saga eginda behera egingo dugu, eta ezkerretara joko dugu, eta iratze bat duen zelaira iritsiko.
Erreka ezkerretara utzita, zuzen-zuzen jaitsiko gara iratzea zeharkatuz, zuhaitz bakan bateraino, zeinaren ezkerrean hartuko dugun bidezidor bat dagoen. Horrela, bide estu horretatik, sastrakadi eremua zeharkatuko dugu, erreka pare bat igaro eta pagadia inguratuko dugu kanpoaldeko beheko zonatik, erreka nagusia dagoen zuhaitz ildaska bateraino. Inguru horretan, bidezidorrak baliza horiko zutoinak ditu. Haiei jarraituz, ondoko belardia eta bere erreka ugariak zeharkatuko ditugu, pistarekin bat egin arte. Aurrera jarraitu, eta Belaustegira itzuliko gara.
