Hego haize puntu bat lagun zela jokatu zen larunbatean Kanpezuko III. Mendi Duatloia, EHMDZ-ko bigarren proba puntuagarria. Partaidetza eta giro ederrarekin –60 izan ziren izena eman zutenak, 36 bakarka eta 12 bikote–, Alexander Ordeñana bizkaitarra (1.41.47) nagusitu zen gizonezkoetan eta Nekane Pradera gasteiztarra (2.14.36) emakumezkoetan. Garaipen horrekin, gainera, Praderak zirkuituko sailkapen nagusiko lehen postua lortu du Durangoko lehen proban hirugarren izan ostean. Mutiletan, berriz, Josu Urrestarazu idiazabaldarra da orain lider: Durangoko lehen proban bigarren izan zen. eta Kanpezun bosgarren. Erreleboka, Koldo Herrera eta Dani Iparragirrek lortu zuten garaipena (1.33.10)
Durangoko estreinaldian ez bezala, Kanpezuko proban emozio handia izan zen, garaileak hamar segundoren aldea baino ez baitzion atera Eneko Gurrutxaga bigarren sailkatuari (1.41.57). Hirugarren Xabier Agirre izan zen (1:43:39). Bi lehen sailkatuek atzetik aurrerako lasterketa egin zuten eta bizikletako sektorean egin zuten aurrera. Alexander Ordeñanak hamaikagarren amaitu zuen korrikako lehen sektorea, baina bizikletarekin aurretik zituen aurkari guztiak gainditu zituen, eta azken korrika txandan lehen postuari eutsi zion.
Emakumeetan ere antzera gertatu zen: korrika Maite Urteaga zumaiarra ibili zen aurretik, baina bizikletan aurreratu egin zitzaion Nekane Pradera. Azkenean, bigarren izan zen Urteaga (2:18:55), eta hirugarren Ainhoa Marquinez (2.27.52).
Zirkuituko hirugarren proba datorren larunbatean bertan jokatuko da Amasan (Gipuzkoa). Zirkuituko probarik beteranoetako bat da Amasakoa. Urteroko moduan, partaideek ibilbide ederraz gozatzeko aukera izango dute.
Sailkapen guztiak esteka honetan.
