Mendiko eskiko Espainiako Txapelketak egin dira asteburuan Sierra Nevadan (Andaluzia, Espainia), hiru modalitatetan: ostiralean bertikala, larunbatean banakakoa eta igandean taldekakoa. Hainbat euskal eskiatzailek hartu dute parte txapelketetan, eta haietako batzuek dominak eskuratu dituzte beren kategorietan.
Bertikalean, eskiatzaileek 550 metroko desnibela gainditu behar zuten eski pistetan: Al Andalus telekabinatik abiatu eta Borreguilesen bukatu. Euskal partaideen artean, Uxue Loizu nafarrak bosgarren egin zuen, Maria Ordoñez andaluziarrak irabazi zuen proban. Jon Ander Aranburu zumarragarrak (Gipuzkoa) igoera ona osatu zuen, eta seigarren denborarik onena egin zuen helmugan, Nicolas Molina irabazlearengandik bi minutu eta erdira. Aitor Ugarte aramaioarra (Araba) zazpigarren izan zen (U23 kategorian, bigarren), eta Loic Thevin, euskal selekzioarekin lehiatzen den frantziarra, hamargarren. Gazteen artean, U20 kategorian, laugarren izan zen Oier Urkiola; U18 mailan, berriz, Ibai Hernani hamabigarren sailkatu zen, eta Unax Sologaistoa, hamahirugarren.
Larunbatean, eguraldi bero samarra zutela, 1.340 metro inguruko desnibela gainditu behar izan zuten eskiatzaileek banakakoan. Txapelketako proba nagusian, bertikalean baino hobeto moldatu ziren euskal eskiatzaileak. Emakumezkoetan, Uxue Loizu bosgarren izan zen modalitate horretan ere. Proba bera Ana Alonso andaluziarrak irabazi zuen. Gizonezkoetan, hiru euskal eskiatzaile sailkatu ziren hamar aurrenekoen artean: Asier Labairu iruindarra bosgarren, Axier Alonso oñatiarra zortzigarren eta Jon Ander Aranburu bederatzigarren. Ander de Miguel nafarra hamabigarren izan zen. Maila nagusi horretan, Albert Perez kataluniarra izan zen irabazle, esprintean Jordi Alis eta Nil Cardona herrikideei aurrea hartuta.
Gazteen artean, U18 mailan, Ibai Hernani laugarren izan zen, eta Unax Sologaistoa, bosgarren. U20 mailan, Oier Urkiola hirugarren izan zen; eta U23 kategorian, Aitor Ugarte hirugarren helmugaratu zen, eta Jon Razkin, laugarren.
Igandean, azkenik, bikoteka lehiatu ziren eskiatzaileak. Uxue Loizu eta Andrea Zarranz nafarrak laugarren izan ziren taldekako lehia horretan. Proba Ana Alonso eta Maria Ordoñez andaluziarrek irabazi zuten. Gizonezkoetan, Asier Labairu eta Ander de Miguel nafarrak bosgarren izan ziren; Jon Ander Aranburu eta Loic Thevin, seigarren; eta Axier Alonso eta Aitor Ugarte, bederatzigarren. Gazteen artean, berriz, 20 urtez azpikoetan, Oier Urkiola gipuzkoarrak eta Markel Barrio nafarrak osatutako bikoak irabazi zuen, eta 18 urtez azpikoetan, Ibai Hernanik eta Unax Sologaistoak hirugarren egin zuten.
Hiru probetako emaitzak kontuan hartuta, sailkapen konbinatuan, Uxue Loizu laugarren izan da emakumezkoetan. Gizonezkoetan, berriz, lau euskal eskiatzaile sailkatu dira hamar aurrenekoen artean: Asier Labairu bosgarren, Jon Ander Aranburu seigarren, Axier Alonso zortzigarren eta Aitor Ugarte bederatzigarren.
Sailkapen guztiak Espainiako Federazioaren webguneko esteka honetan.
