Guztira 614 korrikalarik parte hartu zuten atzo Zestoako Kobaz Koba Trail mendi lasterketaren bederatzigarren ekitaldian, Antola Arazi IKT eta Agiro mendi klubek Zestoako Udalaren laguntzarekin antolatutako proban. Eguna haizetsu eta euritsu esnatu zen, eta korrikalariek lokatz ugari topatu zuten mendian, baina probaren parterik handienean ateri eutsi zion, ikusleen eta boluntarioen zorionerako.
Mendi lasterkariek bi ibilbide zituzten aukeran: Zaldei (26 km) eta Artzei (15 km), biak ere Zestoa inguruan ugariak diren «historiaurreko koba, aldapa eta bidezidorretan barrena», antolatzaileek nabarmendu bezala. Hala, Ertxiña, Endoia eta Santa Engraziko gainak, eta Ekain, Danbolinzulo, Astigarraga, Amalda, Praileaitz, Astuigaña, Erraila, Urtiaga, Ermitia, Erlaitz, Irikaitz eta Arluze haitzuloak, aztarnategiak eta monolitoak lotu behar zituzten bidean.
Zaldei ibilbide luzean, Eneritz Aramendi azpeitiarra (2.58.12) eta Iraitz Legorburu getariarra (2.14.39) nagusitu ziren. Aramendik hiru minuturen aldea atera zion bigarrenari, Naroa Uria herrikideari, eta Tanit Perez de Lezeta donostiarra izan zen hirugarren. Mutiletan, berriz, Paul Ormaetxea muruetarrak eta Beñat Ibañez zumarragarrak osatu zuten podiuma.
Artzei bidean edo ibilbide laburrean, berriz, Ainara Urrutia aretxabaletarra (1.33.05) eta Mikel Arriola eibartarra (1.17.14) izan ziren aurrenekoak. Nesketan, Ane Elzaurdia beratarra izen zen bigarren, eta Irati Larrañaga usurbildarra hirugarren. Mutiletan, berriz, Joxe Errasti oriotarra izan zen bigarren, Arriolarekin lehia estua izan ondoren, eta Ibai Angulo azpeitiarra igo ziren podiumaren hirugarren mailara.
Lasterketaren ondoren, eskualdeko kalitatezko produktuekin eginiko hamaiketakoa izan zuten parte hartzaile guztiek kiroldegi inguruan.
SAILKAPENAK
Zaldei bidea (26 km)
Emakumezkoak
1. Eneritz Aramendi / Azpeitia / 2.58.12
2. Naroa Uria / Azpeitia / 3.01.20
3. Tanit Perez de Lezeta / Donostia / 3.12.41
Gizonezkoak
1. Iraitz Legorburu / Getaria / 2.14.39
2. Paul Ormaetxea / Murueta / 2.16.49
3. Beñat Ibañez / Zumarraga / 2.16.58
Artzei bidea (15 km)
Emakumezkoak
1. Ainara Urrutia / Aretxabaleta / 1.33.05
2. Ane Elzaurdia / Bera / 1.33.54
3. Irati Larrañaga / Usurbil / 1.34.26
Gizonezkoak
1. Mikel Arriola / Eibar / 1.17.14
2. Joxe Errasti / Orio / 1.17.17
3. Ibai Angulo / Azpeitia / 1.18.27
