Eguraldia lagun, parte hartze politarekin –60 partaide banaka eta 31 bikote–, emakumeen presentzia handiarekin eta sekulako giroarekin jokatu zen larunbatean Euskal Herriko Mendi Duatloien Zirkuituko lehen proba, Durangon. Mugarra triatloi taldeak antolatutako lasterketan, gizonezkoetan, herriko seme bat eta talde horretako kide bat nagusitu zen: Paul Bereziartua. Emakumezkoetan, berriz, Enara Oronoz iruindarrak lortu zuen garaipena, eta iazkoa errepikatu. Horrenbestez, zirkuituko lehen liderrak dira Bereziartua eta Oronoz. Abian da 2024ko udazkeneko egutegia.
Lasterketa batean zein bestean, bi garaileek hasiera-hasieratik lortu zuten probaren aginte makila, eta inor ez zen gai izan haien erritmoari eusteko. Oronozek 01.40.39ko denboran osatu zituen korrikako 7 kilometroak eta bizikletako 17ak. Nafarraren atzetik, Maite Urteaga zumaiarra (01.41.14) izan zen bigarren, eta Nekane Pradera gasteiztarra (01.51.57) hirugarren.
Gizonezkoetan, Bereziartuak argi utzi zuen ez dela alferrik 23 urtez azpiko munduko duatloi eta triatloi txapelduna. Hala, durangarrak 01.20.46ko denboran osatu zuen proba. Josu Urrestarazu idiazabaldarra izan zen bigarren, lau minutura (01.24.53), eta Unai Mateos bizkaitarra hirugarren (01.25.41).
Bikoteka, Durangoko kirolariak izan ziren protagonista. Emakumezkoetan, Mugarra taldeko Paule eta Mier Miota ahizpak nagusitu ziren, eta gizonezkoetan, Oier Ariznabarreta eta Txomin Mañon. Errelebo mistoan, berriz, Nerea Urgoiti eta Jurgi Gorostiza izan ziren azkarrenak.
Zirkuituko hurrengo proba datorren larunbatean izango da Arabako lurretan, Kanpezun hain zuzen ere.
