Alberto Zerainen berririk ez dago larunbatetik

Summit Karakoramek, Nanga Parbat (8.125 metro) igotzeko Alberto Zerainek eta Mariano Galvanek kontratatutako enpresak, atzo jakinarazi zuenez, bi mendizaleen berririk ez dauka joan den larunbatetik; 6.400 metrotik gora zeuden. «Deitu diegu, baina itzalita dago telefonoa. Horregatik, enpresako bost xerpari eskatu nien joan zitezela haien bila, baina ezin izan zuten, uste dugulako 6.400 metrotik gora daudela», esan zuen Muhammed Iqbalek, Summit Karakoramen jabeak. Horregatik, helikoptero bat eskatu dute. Eguraldiak laguntzen badu, helikopteroa gaur joango da Zerainen eta Galvanen bila. Atzo zen joatekoa, baina eguraldi txarrak zapuztu egin zuen saiakera.

Iqbalek azaldu zuenez, altuera ez da kezkatzeko modukoa, baina bai aukeratutako bidea. «Mazeno ertzetik igotzen ari ziren. Biderik zailena da. Behin bakarrik igo da bertatik gailurrera». Iqbalek, hala ere, lasaitasun mezua helarazi nahi izan zuen: «Eremu horretan komunikazio arazoak egon izan dira beste batzuetan. Uste dugu bateria gabe geratu direla. Eskarmentu handiko mendizaleak dira biak, eta badaukate jatekoa».