Bruno Retailleau Frantziako Barne ministroa Lapurdi kostaldean izanen da bihar. Hainbat komisaria bisitatuko ditu, eta Irun eta Hendaiako mugan Frantziako Estatuak migranteen kontra jarri duen operazioa ezagutzera joanen da. Gauean, ekitaldi publikoa eginen du Miarritzeko kasinoan (Lapurdi), Errepublikanoak alderdiko presidente izateko lehiaren karietara. Ezkerreko hainbat eragilek protesta antolatu dute haren etorreraren kontra: 18:00etan izanen da, kasino aitzinean. Eskuin muturreko erramoldeak, tesiak eta logika erabiltzea leporatu diote Retailleauri.
Martxoaren 22an, arrazismoaren eta faxismoaren aurkako mobilizazioa egin zuten Baionan, eta gogor salatu zuten azken hilabeteetan Frantziako Estatuan ezartzen ari den giro politikoa. Orduan mobilizatu ziren eragileek beharrezkotzat jo dute Retailleauren gisako «jendakien» etorreraren kontra altxatzea, eta aldarrikatzea Euskal Herria elkartasunean oinarritzen dela eta arrazismoaren kontrakoa dela. Besteak beste, jatorriz migranteak diren herritarrak «paperezko frantsesak» direla erran izana leporatu diote Barne ministroari. «Frantziako Estatuaren migrazio politika hilgarriak gogortu ditu bere kargua hartu bezain fite. Zuzenbide estatua bermatu ordez, bortizki eraso egin dio, eta, berriki, epaileei eraso egin die, «epaile gorriak» deitu baitie.
Retailleauren bisitaren harira, EH Baik «ezinegona» adierazi du, uste baitu Ipar Euskal Herrian eskuin muturreko ideiei bide ematen ari zaizkiela eskuineko hainbat sektore. «Onartezina da barne ministroari harrera abegikorra egitea eta defendatzen dituen ideia arrazista, atzerakoi eta erreakzionarioei hauspoa emateko ekitaldiak antolatzea», erran dute agiri batean. Ezkerreko abertzaleen iritziz, azken hilabeteetako hainbat gertakarik erakusten dute Ipar Euskal Herrian eskuineko zenbait hautetsi eskuin muturraren ideia horietara hurbiltzen ari direla.
Ipar Euskal Herriko eragile sozial, sindikal, politiko eta instituzional guziei eta oro har herritarrei dei egin diete «jendartea zatitu dezaketen ideiak» baztertzera. «Gure lurraldean bakea, demokrazia, elkartasuna eta pertsona guzien eskubideetan oinarrituriko elkarbizitza defendatzeko garaia da».
