Kulturaldia eginen dute Baigorriko eskualdean, maiatzaren 1era arte

Iturri zaharretik ur berria heldu den bezala, tradizionala izanagatik ere euskal kultura etengabe berritzen dela uste du Baigorriko Basaizea elkarteak. Horren seinale da Kulturaldiaren karietara antolatu duen programa. «Afixak ongi erakusten du gure ideia: estatuak ageri dira, eta mugimendua gehitu zaie, freskotasuna ekarriz, berrituz eta modernotasuna gehituz. Gure kultura ez dugu museifikatu nahi; beti mugimenduan izan dadin nahi dugu». Horrela laburbildu du Gilen Zaldunbide Basaizea elkarteko kideak aurtengo aldiaren izpiritua. Egun hasiko da Kulturaldia, migrazioaren inguruko eztabaida batekin, eta maiatzaren lehenera arte iraunen du; arras finitu aitzin, urtero antolatzen duten Nafarroaren Eguna ospatuko dute apirilaren 28an.

Basaizeako kideek, Kulturaldia aurkezteko agerraldian euskal kulturaren folklorizazioa gaitzetsi dute, eta mugimenduan den kultura bat aldarrikatu dute: «Kanpotik, anitzetan, gure iturria museoko pieza bihurtu nahi dute: euskara bera zapalduz eta geroz eta lanjer handiagoan emanez. Erakusleihoetan harro agertzeaz gain, irizpide seduzitzailea ere zabaltzen dute, iturri zaharreko isuria geldiaraziz: ura harri bihurtuz». Are gehiago, Zaldunbidek uste du euskara «marketin» produktu bat bilakatzen ari dela. «Egun biziki modan da, baina horrek arriskuak baditu, eta horren inguruan hausnartu nahi izan dugu».

Euskal Herriaren eguna

Egitaraua hasteko, egun, hitzaldi bat antolatu dute Izpegiko Bereko bentan. Migrazioaren inguruan mintzatuko dira errefuxiatuen laguntzarako elkarteak, abokatu bat eta errefuxiatuak, 19:30ean. Ondoko topaketa bihar izanen da, Anche et Cie orkestrarekin: kontserbatorioko gaita, oboe eta basoi ikasleen orkestrarekin. Baigorriko Biletxean izanen da kontzertua, 16:00etan. Apirilaren 11n, Josu Martinezen Mirande, film bat egiteko zirriborroa hedatuko dute Baigorriko Biletxean: filmaren egilea hor izanen da, eta Joseba Sarrionandia idazlea eta Nora Arbelbide kazetari eta liburuzaina ere bai. Apirilaren 12an, Gora Euskal Herrientsak aurkeztuko du Asisko Urmeneta marrazkilariak, Urepeleko Amerikanoenean, 20:00etan.

Duela urte zenbait antolatu ez den ekimen bat ere berreskuratu nahi izan dute aurten Basaizeako kideek: apirilaren 20an Euskal Herria eguna ospatuko dute. Zaldunbidek esplikatu du zazpi probintzietatik «herri bat biltzea» dela asmoa, eta egun osoko «trukaketa» bat sortzea. «Basaizea elkartearekin azken urteetan parte hartzen genuen topaketa horretan, eta ttipitu zenez berriz hasteko beharra ikusten genuen. Harremanak egitea betidanik izan da Basaizearen ildo nagusietariko bat, eta Euskal Herria eguna antolatuz hori egiteko parada ikusten dugu». Herri batzuk egitasmoaren partaide dira, eta Zaldunbidek esplikatu du urtero horietako batek antolatzen duela Euskal Herriaren eguna; heldu den urteetarako, beraz, beste herri batek antolatuko duela espero dute, egitasmoa berriz martxan jar dadin.

Apirilaren 27an, Nafarroaren Egunaren bezperan, Ai gure Juaneteak antzerki musikatua izanen da Baigorriko Biletxean, 20:30ean. Nafarroaren Eguna hilaren 28an izanen da: «Euskararen inguruan Euskal Herri osoa biltzeko eguna» izanen da, Zaldunbideren hitzetan. Kulturaldia finitzeko, maiatzaren 1ean, Arrosako Elgenian, Mejillon Tigre emanen dute Hitz Esan konpainiakoek.