Aldaketak izanen dira Frantziako hezkuntza administrazioan. Martxoaren 26tik aitzina, Jean-Marc Huart izanen da Bordeleko Akademiako errektore berria. Anne Basigni-Faure ordezkatuko du; 2019tik atxiki du kargu hori.
Hezkuntza arloan ibilbide luzea duen funtzionarioa da Huart. Besteak beste, eskola irakaskuntzako Frantziako zuzendaritzako burua izan 2017 eta 2019 artean, Jean Michel Blanquer Frantziako Hezkuntza ministro izan zen garaian.
Euskarazko irakaskuntzaren aldeko eragileek tentsioz beteriko harremana izan dute azken urteetan Bisagni-Faurerekin. Iazko urtarrilean, hizkuntza gutxituetako eragileek salatu zuten Bordeleko errektorea zela irakaskuntzako oztopoen erantzulea. Adierazi zuten haren eskaria izan zela brebetako ariketetako galderak frantses hutsean izatea, eta azken urteetan hizkuntza gutxituen irakaskuntzari erakutsi dion «etsaigoa» salatu zuten.
BERRIAk jakin duenez, Pirinio Atlantikoetako Departamenduko akademia ikuskaria ere aurki aldatu behar lukete. François Xavier Pestelek atxiki du kargua azken urteetan.
