Donapaleuko Amikuzeko kolegioko frantses irakaslea da Estibaliz Cledon (Donapaleu, 1985). 301 ikasle ditu kolegioak aurten, eta heldu den ikasturtean 310 izatea aurreikusten dute. Alta, errektoretzak bi gela hetsiko dituela iragarri du. Irakasleek eta gurasoek elkarretaratze bat egin zuten joan den astean, salatzeko irakasteko baldintzak okertuko direla eta hesteak behar bereziak dituzten ikasleen inklusioa oztopatuko duela.
Bi gela hetsiko dituzte heldu den ikasturtean Amikuzeko kolegioan. Zein da egoera?
Urtarrilean, errektoretzak ondoko ikasturterako ordu kopuruak igortzen ditu urtero, eta hor gutxi gorabehera badakigu zenbat gela eta ordu kopuru izanen ditugun. Urtarrilean, beraz, jakin dugu bi gela hetsiko dizkigutela heldu den urterako, bat laugarrenean eta bestea hirugarrenean. Alta, 92 ikasle ditugu bosgarrenean; horrek erran nahi du heldu den urtean hiru gela ukanen ditugula laugarrenean, horietarik bi 31 ikaslerekin. Eta hirugarrenean, berdin: 64 ikasle ditugu, eta heldu den urterako bi gela bakarrik atxikitzen dizkigute; beraz, 32 izanen dira bakoitzean. Gehiago dena, haien kalkuluetan ez dituzte IEP Inklusiorako Egitura Pedagogikoaren barneko ikasleak kontuan hartu; laguntzaile bat duten behar bereziko ikasleak dira, eta ez dituzte haien kalkuluetan sartu. Zinez arazo larri bat bada.
Ikasle gehiago izanen dira klaseetan. Zer ondorio du horrek irakasleentzat eta ikasleentzat?
Hasteko, erran nahi du ikasgela batzuetan fisikoki ez direla ikasle guziak sartzen ahalko. Ikasketa baldintzei begira, legez, gela baten gehienezko ikasle kopurua 30ekoa da; 28tik goiti jadanik biziki zaila da guretzat, ikasle anitz baititugu maila desberdinekin. Irakasteko zinez baldintza txarrak izanen dira, eta ikasleentzat ere bai.
Aipatu duzu IEP egitasmoko ikasleak ez direla kontuan hartuak izan. Nolaz?
Jakin behar da IEP egitasmo berezi bat dela, eta ikasle horiek MDPH Elbarrien Departamenduko Etxean dosier bat osatu behar dutela laguntzaile bat ukaiteko. Helburua da inklusioan izatea, eta ahal bezain bat kurtso segitzea. Ulertzen ez duguna da beste kolegioetan ikasle horiek kontatzen badituzte ordu kopuruak trenkatzean, gurean zergatik ez den hala. Segur aski erreforma berriarentzat behar dituzten kalkuluetan ez zen ontsa erortzen.
Zer da erreforma berri hori?
Seigarrenean eta bosgarrenean ikasleak beren mailaren arabera ezarri nahi dituzte matematiketan eta frantsesean. Urtero ateratzen dira Europako ikasleen mailari buruzko ikerketak, eta, Frantzian omen datu txarrak direla, erreforma horrek emaitzak hobetzeko balioko duela diote. Baina mailaren araberako gelak egiteak ordu gehiago behar izatea ekartzen du, eta, beraz, ordu horiek behar zituzten beste leku batetik kendu.
Zer diozu erreforma berri horretaz?
Mailaren araberako klaseak egiteak erran nahi du seigarrenean sartzen den ikasle batek hiru gela izanen dituela: gai gehienetarako gela, bere mailaren araberakoa frantsesean, eta oraino beste bat matematiketan. Laburbilduz, bi irakasgai horietan, zailtasunak dituzten guziak elkarrekin izanen dira, maila ertaina dutenak elkarrekin eta erraztasunak dituztenak elkarrekin. Jakinez zailtasunak dituztenen geletan hamabost izan beharko dutela gehienez ere: erran nahi du besteetan 30 edo gehiago izanen direla. Artetik errateko, hamabost ikasle baino gehiago dira zailtasunetan direnak. Injustizia bat da, haurrak estigmatizatuak izanen direlako; eskoletan jadanik guraso batzuk arranguratzen hasiak dira beren haurra zein mailatan izanen den jakiteko, eta ikasle batzuk jadanik hasiak dira erraten ikasle txarrak direla eta mentsekin izanen direla: estigmatizazioak konfiantza galtzea eragiten du. Beste arazoa da kolegioaren barne antolaketarentzat biziki zaila izanen dela; frantseseko klase guziak momentu berean izan beharko dira, lau gela izanen dira, baina hiru irakasle gara bakarrik, eta matematiketan hiru klase izanen dira aldi berean, baina bi irakasle dira bakarrik. Ezinezkoa da.
Zer galdegiten duzue zuek?
Gelak irekitzea ikasle kopuruaren arabera eta ez errektoretzaren nahien arabera. Heldu den urtean bederatzi ikasle gehiago izanen ditugu, eta bi gela galduko ditugu; ez da onargarria. Inklusioa ezingo dugu segurtatu baldintza horietan. Oraingoz, plantan dugunak funtzionatzen du: oraingoz, geletan 25 dira, zailtasunak dituzten ikasleak hurbiletik segitzen ahal ditugu taldeak ez direlako sobera handiak.
Mobilizatzen segituko duzue ondoko asteetan?
Bai. Tokiko hautetsiak akuilatu ditugu, eta gurasoak ere mobilizatuak dira. Badakigu Iñaki Etxaniz diputatuak gure kasua segitzen duela. Bestalde, Akademia Ikuskaritzan hitzordu bat galdegin dugu, gure kezkak kontuan har ditzaten. Berehalakoan, IEPko ikasleak kontuan har ditzatela galdegiten dugu.
