Duela zenbait egun, 1944an Normandian gertatu hamar milaka soldaduren lurreratze famatua ospatu zuten. Nazi ideologiak bultzaturik, kasik Europa osoa menderatu zuen Alemaniak. Hamar bat urte lehenago, Hitler demokratikoki, bozak baliatuz, boterera heldu zen Alemanian. Erraten den bezala, batzuetan iduri du historia errepikatzen dela...
Kasik 100 urteren buruan orduko ideologiaren erro berdinetik hazi den alderdi politiko bat badugu gaur egun, Frantzian, honek ere demokratikoki, bozen bidez, berehala boterea har lezakeena. Duela 100 urte juduak zituzten begietan. Horiek ziren orduko eskuin muturraren ideologian Frantziako makur guzien hobendun, ezkerreko jendearekin batean, homosexualekin ere berdin… Eta jakina da, azkenean, juduak, ezkerreko jendea eta heterosexualak, hots, normalak ez zirenak gasez ito zituztela. Alemanian hasi zen, baina Frantzian ere bazen eskuin muturreko faxista franko, eta gisa horretan Petainek ordezkatzen zuen kolaborazionisten fenomenoak ontsa lagundu zuen Hitler.
Horiek guziak eskolan, historia liburuetan, ontsa argitara emanak dira alta…
Nolaz beraz Landibarre bezalako herri ttipi batean ideologia faxista okaztagarri horrek 40 boz bildu ditu? Ene inguruan, Landibarren beraz, badira 40 faxista?
Bakar batzuk badira, bai, intoleranteak, eskuin muturrekoak, ele txarra ahoan, gaiztakeria gogoan. Baina besteak? Baneki nor diren 40 horiek... Erran niezaieke arrunt tronpatzen direla bidez. Erran niezaieke elkar lagunduz, jendetasunean, batzuetan pazientzia kutsua hartuz bizi izan garela mendez mende gure artean ibar txoko honetan. Ideologia ustel horrek ez ditu lagunduko beren egun guzietako arazoen konpontzen... Hori segur. Esperantza erein dezagun, jendetasuna hozi dadin.
