Udaberriarekin batera, kirolari irudiz jantzi da herria. Egun historikoa datorrela iragarri dute. Elkartasuna, esfortzua, laguntasuna, kultura… bezalako hitzak irakurtzen dira argazki erraldoien gainean. Su olinpikoa pasatuko omen da Hazparnetik datorren astelehenean, baita Miarritze, Angelu, Baiona eta Donibane Lohizunetik ere.
Egun handirako, programa handia aurreikusia da: zezenak eta zapi gorriak, kantuak eta idiak, pilota erakustaldiak eta Lehen Mundu Gerrako soldaduen omenezko dantzak. Danborrada, joaldunak eta mutxikoak ere iragartzen ditu frantsesez idatzitako traktak. Gertakariak diskurtso unibertsala ekartzen duela diote hautetsiek: populuen arteko bakea, harrotasuna, anaitasuna, eta, sustut, Frantziako Errepublikaren balioak.
«Euskal» eta «kirol munduko» dekoratu batekin eskaintzen duten antzerki merkea, Euskararen Erakunde Publikoaren aitzinkontua emendatzea errefusatu duen Pirinio Atlantikoetako departamenduak, 180.000 euro eskainirik karia horretara.
Alta, aho handiz aipatzen ez badute ere, badakizu horrek ekarriko dituenak esklusioa, bideozaintza, polizia andana, turismoa, gentrifikazioa, enpresa babesleen moltsak betetzea, estatu zapaltzaileen irudi garbiketa eta abar luze bat direla, berriz ere… Eta Israelen Olinpiar Jokoetako parte hartzea eta Euskal Herriko kirolari olinpikoak atzerriko koloreekin ikustea…
Ez dakizu zehazki zergatik, baina, bitxiki, déjà vu sentsazio garratz bat hedatu zaizu ahoan.
