Baipeleteneko Irakurle Klubak (BIK) Maialen Hegi-Luku gomitatu du gaur Larzabaleko Espelletenea ostatura Girgileri Anderea (Elkar, 2018) eleberria aurkeztera. Sarri izanen da, 19:30ean. 2018an plazaratu zuen liburua, eta iazko urte hondarrean frantsesezko itzulpena argitaratu zuen (Madame Pacotille), baina gaur euskarazko bertsioaz ariko da, psikiatriako erizain baten lekukotasunaz lagundurik, eleberriaren gai zentrala bipolaritatearen eritasuna baita.
Ez da liburu berria, baina interesa pizten du oraino. Frantsesezko bertsioaren aurkezpenen artean, idazlea «biziki kontent» agertu da Larzabaleko gomitarekin, eta gehiagotan aurkezteko prest dela ziurtatu du. 2018az geroztik, parada guti ukan ditu irakurle taldeekin liburua aipatzeko; bi aldiz egin du ariketa hori: Seguran (Gipuzkoa) eta Baionan. AEK-ko langilea denez, ikasleekin ere aurkezteko paradak ukan ditu. Hegi-Lukurentzat, Segurakoa biziki «hunkigarria» izan zen. «Aukera ederra izan zen liburua irakurri zuen jende batzuekin solastatzea horri buruz. Gainera, Gipuzkoan zen, eta plazer egiten zuen ikustea hango jende batzuk irakurtzen lapurtar baten liburua».
Eritasuna aipagai
2016an zion gaiak idazteko motibazioa piztu: «Nahi nuen erreferentzia bat edo errepresentazio bat sortu eritasunaren inguruan, bipolaritatea pairatzen zuen pertsonaia batekin. Inporta zitzaidan gai hori aipatua izatea beste edozein gai bezala», zehaztu du idazleak. Irakurle taldeekin bildu izan delarik, preseski, gogoan du gaiak interes berezia sortu izan duela, «galdera franko» izan baitira gehienetan, eta «isiltasun uneak» ere bai batzuetan. Hegi-Lukuk liburua agertu berritan zehaztu zuen inguruko jendea hunkia izateak eta hura bera ere diagnostikatua izateak ekarri ziotela idazteko gogoa. Oraino ere, BIKek antolatu solasaldian bezala, «gai hori aipatzen segitzea eta edozein gai euskaraz aipatu ahal izatea» inportantea zaio.
«Nahi nuen erreferentzia bat edo errepresentazio bat sortu bipolaritatearen eritasunaren inguruan».
MAIALEN HEGI-LUKU Idazlea
AEKren koadroan egin aurkezpenetan, Hegi-Lukuren erranetan, lekukotasunak ere izan ziren eleberriaren aipamenari lotuak: «Galdera anitz, lekukotasunak ere bai, jende frankok ezagutzen zuelako ahaide edo ezagun bat hunkitua zena». Beraz, liburua idazteko motibazio argia zen gaia ezagutaraztea. Irakurle taldeekin ukan trukaketek neurria hartzeko balio izan diote, eta gehienetan ezezagutza nagusi dela irudi zaio, gaia ez dela «hain ezaguna, orokorrean». Erreakzio «seriosak eta hunkituak» oroitzen ditu, bereziki, «jendea aski durduzatua» izaten ahal baita gaiarekin, idazlearen ustez.
Iragan apirilaren hondarrean, frantsesezko bertsioa aurkeztean Mauleko Tandem liburu dendan, Bipolaires 64/40 elkarteko kideak ukan zituen ondoan: «Haiek galdera teknikoei erantzun zieten», zehaztu du idazleak. Esperientzia hori euskarara ekartzeko, BIKeko kideek psikiatriako erizain bat gomitatu dute gaurko hitzaldirako, bere esperientziarekin «umilki» osa dezan eritasunaren inguruko mahai ingurua.
Gaztelumatik idazle
Ideia ukan bezain sarri eleberri bat idazteko plana marraztu bazuen ere, eta aitzinetik itzultzaile gisa egin lanetan idazketa landurik ere, Hegi-Lukuk ez zuen idazle gisa bere burua «batere zilegi sentitzen» 2016an. Gero, Gazteluma saria irabazi zuen. Saria urrats handi bat izan zela erran du «geroztik idazle sentitzen» denak: «Horrek eman zidan zilegitasun zerbait idazle bezala pausa bat egiteko eta idazketa lantzeko, sormenaren aldetik ere urrats batzuk egiteko».
2021. urteaz geroztik Elkar-EKE literatura beka bilakatu da Gazteluma saria, eta hori ere bi urtetik behin egiten da deialdia. 2023ko azaroan Idoia Rodriguez Mondragonek aurkeztu proiektua laguntzea deliberatu zuen epaimahaiak, eta heldu den udaberrian argitaratuko da haren lana.
