Itsasoaren zale direnek ontziak bertatik bertara ikusteko aukera izango dute gaurtik igandera bitartean Irunen, Ficoba erakustazokan. Izan ere, Ababor azoka nautikoaren hirugarren aldia egingo dute. «Eskaintza aberatsa eta erakargarria» prestatu dute Hondarribiko eta Irungo udalek eta Hondarribiko Klub Nautikoak. Aisialdiaz gozatzeko itsas jarduerak aukeratzen dituztenentzat pentsatutako proiektua da Ababor; antolatzaileen esanetan, «geroz eta gehiago» dira itsas jarduerez gozatu nahi dutenak. Hori dela eta, Ficoba berrogei erakusketariren aterpe izango da asteburuan, eta proiektuaren sustatzaileek esan dute bisitariei eremu eroso bat eskaini nahi dietela itsasoaz eta uretako jarduerez gozatzeko.
«Ababor erreferente bihurtu da nautika eta sektorea gogoko dutenentzat. Uste dugu azokaren hirugarren aldia ona izango dela»
MAIALEN GAZTAÑAGAIrungo Ababor azoka nautikoaren zuzendaria
Azoka 2022an egin zuten aurrenekoz, eta, aldi hartan bezala, azokara joaten direnek aukera izango dute salgai edo alokatzeko dauden ontziak bertatik bertara ikusteko, laketontzien titulazioren bat lortzeko eta itsas kirolei buruzko informazioa jasotzeko. Maialen Gaztañaga Ababorreko zuzendariak esan du aurreko bi aldiek «arrakasta handia» izan zutela; izan ere, laurogei enpresa izan ziren erakusketari, eta ia 10.000 bisitari erakarri zituzten. Hori dela eta, zuzendariak dio azoka «garrantzi handiko ekitaldia» bihurtu dela Bidasoa eskualdean. «Ababor erreferente bihurtu da nautika eta sektorea gogoko dutenentzat. Uste dugu azokaren hirugarren aldia ona izango dela».
Askotariko jarduerak
30 itsasontzi baino gehiago izango dira, eta Gaztañagak aurreratu du «plataforma paregabea» eskainiko dutela sektoreko azken berrikuntzen berri izateko, hala nola motorrak, atoiak, elektronikako gailuak eta osagarriak, zerbitzuak, aseguruak, arrantzarako osagarriak eta ur motorrak. Aurten, berrikuntza gisa, bigarren eskuko ontziak ere izango dira, eta, hori dela eta, erakusketarako eremua handitu egin behar izan dute antolatzaileek.
Horretaz gainera, askotariko hitzaldiak, mahai inguruak eta jarduera praktikoak prestatu dituzte; izan ere, antolatzaileek diote Ababor «elkartzeko eta ikasteko gunea» ere badela. Bestelako jarduera batzuk ere antolatu dituzte: besteak beste, Gaming gunea —teknologia eta itsasoa uztartzen dituen espazioa—, lehiaketa birtual bat, eta arrauneko ergometro txapelketa bat.
