Pasaiako Portu Agintaritzak neurri berri bat jarri du indarrean orain gutxi: han arrantzatzen dutenei isuna jarriko diete. Otsailean ohartarazi zuen arau hori abiatuko zuela, eta martxoaren 1ean jarri zuten martxan. Ordutik hona, izan dira isunak jaso dituzten arrantzaleak, eta berrehun euroko zigorrak jarri dizkiete. Ehunka pertsona agertu dira neurriaren aurka, eta Arrantza bai lelopean, protestarako mobilizazioa egin zuten martxoaren 21ean, Pasai San Pedron, kanaberak eskuetan hartuta. «Oraindik ez digute zentzuzko arrazoirik eman», esan du Txema Fuente Pasaiako Arrantza Askea elkarteko kideak.
Pasaiako Portu Agintaritzak dio bere araudiko 64. artikuluan oinarrituz hartu duela neurria, eta, horrenbestez, arrantza praktikatzen zuen orok berrehun euroko isuna jasoko duela. Fuentek azaldu du arrantzatzea «betidanik» egon dela debekatuta, baina orain isuna jartzeko «mehatxua» egin duela. «Artikulu hori betidanik egon da; lehenago zergatik zegoen baimenduta han arrantzatzea? Ez du zentzurik. Zerbait ezkutatzen ari dira».
64. artikuluak hainbat ekintza debekatzen ditu, hala nola portuan aulkiak eta mahaiak jartzea, bertan kozinatzea, taldean eserita egotea, uretara sartzea eta arrantzatzea. Izan ere, Portu Agintaritzak dio horrelako jarduerek zaborra sortzen dutela eta bizilagunak molestatzen dituztela. «Badira zaborra uzten dutenak, leku guztietan bezala. Hori egiten dutenei jarri beharko litzaieke isuna, eta kito», esan du Fuentek. «Beste leku askotan zabor pila bat sortzen da: jaietan, adibidez; eta horregatik debekatu egin behar al dira?».
«Debekuak ez gaitu inora eramango; ezin digute denoi bota errua gutxi batzuek egiten dutenagatik»
TXEMA FUENTE Pasaiako Arrantza Askea elkarteko kidea
Arrantza Askea elkarteak proposatu du aisia arrantzarekin uztartzeko praktika batzuk erregularizatzea. «Badakigu badagoela gehiegi arrantzatzen duen jendea, eta, ondoren, arrain hori saltzeko erabiltzen duena. Hori arautzea ongi legoke, baina debekuak ez gaitu inora eramango», dio Fuentek. «Ezin digute denoi errua bota gutxi batzuek egiten dutenarengatik. Eta gauza bera zaborra sortzen dutenekin edo bestelako jarduera txarrak dituztenekin».
Hondarribian, 1959ko debekua
Pasaiakoa portukoa ez ezik, beste hainbat lekutako debekuak ere salatu ditu Arrantza Askea elkarteak. «Lehengoan esan ziguten Getarian ere arrantzale bati isuna jarri ziotela portuan arrantzatzeagatik. Eta Hondarribian 1959ko arau bat jarri dute indarrean», adierazi du Fuentek. Hondarribian arrantzatzeko arauak dio soilik Hondarribia, Irun, Hendaia, Urruña eta Biriatu herrietako jendeak arrantza dezakeela Bidasoa ibaian eta Txingudi badiako kostaldean. «Askok, kanpokoak izanik ere, betidanik arrantzatu dugu Hondarribian, eta orain debeku hori ere ezarri digute», dio Fuentek.
Arrantzak pisu handia izan du Euskal Herriko kostako herrietan. «Tradizio handia dago Pasaian ere; betidanik arrantzatu da, eta horrela jarraitu beharko genuke», esan du Fuentek. «Orain, txikiek ezingo dute arrantzan ikasi, eta jardun horretan betidanik ibili direnek ezingo dute jarraitu. Pena handi bat da». Elkarteko kideak dio portutik kanpo arrantzatzeko alternatiba bakar bat dutela: arroketan aritzea. «Baina nola bidaliko dugu jende heldua arroketara? Nik orain 62 urte ditut, eta hemendik urte gutxira ez naiz gai izango arroketan ibiltzeko». Horrez gain, arrantzaren transmisioa egitea garrantzitsua da elkartearentzat, eta iruditzen zaie ezinbestekoa dela haurrei arrantzan erakustea.
Pasaiako Portu Agintaritzak hartutako neurriaren ondorioak arrantzaleengan izan dute eragina, eta Fuentek uste du portuko giroan ere ondorioak izan ditzakeela. «Aste honetan egin duen eguraldi onarekin, portua jendez beteta egongo litzateke. Aurreko asteburuan portu ondoan dauden tabernetatik pasatu nintzen, eta hango barrak pintxoz beteta zeuden. Arrantzaleak bertan ibiliko balira, tabernak beteta egongo lirateke eta giro hobea antzemango litzateke».
Erantzunaren zain
Arrantza Askea elkartea harremanetan jarri da Arrantza Federazioarekin, baina Fuentek jakinarazi du oraindik ez dutela erantzunik jaso. «Federazioak portuaren zuzendaritzari azalpenak eskatu dizkio, baina guri oraindik ez digute ezer esan. Espero dugu erantzuna aste honetan izatea; bestela, beste mobilizazio bat egin beharko dugu».
Elkarteko kideak harremanetan jarri ziren Pasaiako alkatearekin ere, baina, Fuentek esan duenez, ez zuten inongo aurrerapenik egin. «Galizian gurean bezalako debeku asko ezarri zituzten, baina bertako APERS elkarteak debeku ia denak kentzea lortu zuen. 120 portuetan zegoen debekatua arrantzatzea, eta 108 portutan kendu zuten debekua. Haiekin hizketan ari gara, elkarlanean jarduteko».
