Bihar jokatuko da Gipuzkoako Bertsolari Txapelketako finala, Donostiako Illunben. Udaberrian jokatu zen Gipuzkoa Bertsotan sailkapen fasea kontuan hartuta, 35 saio izan dira denera, eta laurogei bertsolarik baino gehiagok hartu dute parte. Illunbeko oholtzak zortzi aulki ditu, ordea, eta aulki horiek badute nor eseriko: Beñat Gaztelumendi, Alaia Martin, Oihana Iguaran, Ane Labaka, Nerea Elustondo, Eneritz Artetxe, Andoni Rekondo eta Aner Peritz. Ane Ezenarro eta Iker Iriarte arituko dira aurkezle eta gai emaile, hurrenez hurren, eta Arantzazu Loidik jantziko dio txapela irabazleari. 17:00etan hasiko da saioa.
Ikusi gehiago
Gaztelumendiri, Martini eta Iguarani finalaurreko saio bana irabazteak eman die finalean kantatzeko aukera, eta gainerako bost bertsolariei, berriz, puntuazioak.
Ikusi gehiago
Finalean kantari arituko direnetatik bostek —Gaztelumendik, Martinek, Iguaranek, Labakak eta Elustondok— badute eskarmentua Gipuzkoako Bertsolari Txapelketako finalean. Gainerakoentzat, berriz, aurreneko aldia izango da. Are, Rekondo eta Peritz estreinakoz aritu dira txapelketan, eta debutean lortu dute punta-puntaraino iristea. Bestelakoa da Artetxeren egoera, bederatzi urte eman baititu txapelketan izena eman gabe, eta orain lortu du finalerako sailkatzea.
Ikusi gehiago
Asteartean egin zuten finalaren aurkezpena, Illunben, eta bihar aurkezle lanetan arituko den Ane Ezenarrok esan zuen Gipuzkoako Bertsolari Txapelketa «bide polita, oso aberasgarria, eta denek elkarrekin egindakoa» izan dela, eta biharko saioa ibilbide horren «erremate» gisa definitu zuen.
