«Estropada hau irabazteko asmoa dut; irabazi egin nahi dut. Baina, lehen aldiz, poztu egingo nintzateke Deustuk irabaziko balu», esan du EHUko Ingeniaritza Eskolako traineruaren entrenatzaile Iñigo Martinez de Alegriak. Gaur egingo dute Deustuko Unibertsitateak eta Ingeniaritza Eskolak lagun arteko 43. estropada, 19:00etan, Erandio eta Bilbo artean, eta, lehen aldiz, talde mistoak osatzeko aukera eskaini die desafioa antolatzen duen Pride klubak. Deustuk erabaki du zortzi arraunlariak andreak izatea. Unibertsitate publikoaren zortzikotea, berriz, lau emakumek eta lau gizonek osatuko dute. Beraz, lehenengoz, gehiengoa izango dira andreak.
Deustuko kapitain Maialen Mielgoren esanetan, aurten «estropada bi» daude, eta «eta lehena dagoeneko irabazi da», emakumeen presentziari esker. «Talde indartsua osatu dute, goi mailakoa», nabarmendu du Martinez de Alegriak aurkariez. Mielgo bera Kaikuko arraunlaria da, eta otsailean urrezko domina lortu zuen autonomia erkidegoen arteko olinpiar arraunaren Espainiako Txapelketan, Galizian. Paula Diaz Maizkurrena izango da ingeniaritza ikasleen kapitaina, eta hura ere Kaikuko arraunlaria da.
Dena den, gaurkoa ez da izango desafioan andreek parte hartuko duten aurreneko aldia, nahiz eta modu anekdotikoan izan lehen. Desafioaren sustatzaile Jose Maria Gorostiagak gogoratu duenez, hiru andre patroi lanetan ibili izan dira. Lehena Idoia Korta izan zen, 1994tik 1997ra; Deustuko Unibertsitateko trainerua gidatzen zuen. Urte horietan EHUko arraunlariek irabazi zuten desafioa. Lehen garaipena eskuratu zuen andrea Ruth Martinez izan zen, 2005ean, Ingeniaritza Eskolakoen lemazain zela. Hirugarren andrea Maialen Arrazola izan zen, 2011tik 2017ra, ingeniarien lemazain izandakoa.
datuak
27
Deustuko Unibertsitateko eta Ingeniaritza Eskolako ikasleek arraunean indarrak neurtu dituzten 42 aldietatik, gehienetan Deustukoek irabazi dute: 27 garaipen eskuratu dituzte; azkena, iaz.
4
Deustuko eta Ingeniaritza Eskolako ikasleen traineruak Erandiotik abiatuko dira, 19:00etan, eta lau itsas miliako ibilbidea —7.408 metro— osatu beharko dute, Bilboko udaletxera arte.
Gorostiagak Oxford-Cambridge (Ingalaterra) desafio ezagunarekin alderatu du Bilbokoa. Izan ere, Erresuma Batuan Aste Santuko oporretan egin ohi dutenean oinarrituta sortu zen Deustukoen eta Ingeniaritza Eskolaren artekoa. «Ingelesek 110. estropadara arte ez zuten izan andreen desafiorik, eta guk 43.ean izango dugu. Aurrea hartu diegu», esan du Pride klubeko kideak. Baina Oxfordeko eta Cambridgeko unibertsitateen arteko 110. desafioa 1964an izan zen, eta Bilboko itsasadarrean 2025era arte itxaron behar izan dute andreak gehiengoa izateko. Antolatzaileen esanetan, haien helburua da, Ingalaterran bezala, Bilbon ere estropada bi antolatzea, egun berean, bata bestearen atzetik: gizonezkoena eta emakumezkoena.
Erronka
Estropadarako desafioa martxoaren 20an egin zion Ingeniaritza Eskolak Deustuko Unibertsitateari, amabitxi eta aitabitxi zituztela Eva Ferreira EHUko errektore ohia eta Jose Ignacio Goirigolzarri bankari ohi eta Deusto Bussiness Schooleko presidentea. Protokoloaren arabera, aurreko urteko galtzaileari dagokio besteari erronka botatzea, eta hala egin zion Paula Diaz Maizkurrenak Maialen Mielgori.
EHUk talde mistoarekin lehiatzea erabaki du, eta Diaz Maiezkurrenak nabarmendu du arraunean ez dela arrotza eredu hori: «Arrauna eredugarria izaten ari da. Joko Paramerikarretan dagoeneko badago eredu mistoa, eta hurrengo Olinpiar Jokoetan ere egongo da lehen aldiz».
San Jose egunaren biharamunean egin zuten erronka botatzeko ekitaldia, eta Deustukoen kapitain Mielgok unibertsitatearen atzeko magaletik Bilbori begira dagoen santuaren irudia hartu gura izan zuen gogoan. «Arotza eta langilea zen, gizartea sostengatzen dutenetakoa, apal lan egiten dutenetakoa. Gizartean bezala, arraunean ere ezinbestekoak dira balio horiek: ahaleginik gabe, ez dago palakadarik; kemenik gabe, ez dago aurrerabiderik; talderik gabe, ez dago garaipenik». Haren arabera, arrauna «ez da genero kontu bat; pasioa eta esfortzua dira garrantzitsuenak». Hala ere, berak gidatutako zortzikoteak historia egin gura duela esan zuen, Bilboko desafioa irabaziko duen lehen andre taldea bihurtuz.
