2013ko apirilaren 11n, sute izugarri batek Bermeoko alde zaharra astindu zuen. Hainbat eraikin suntsitu, eta 70 bermeotar etxe barik utzi zituen. Besteak beste, udaletxea erre zen: XVIII. mendeko eraikin barroko bat. Hainbat urteko zaharberritze lanen ondoren, abenduan ireki zituen berriz ateak. «Badakigu beltzean badagoela berdea, eta errautsean ernea. Gure alde zaharra hasi da ernetzen, eta baita gure herriaren etxea ere: udaletxea», esan du Nadia Nemeh Shomaly alkateak.
Sutearen 12. urteurren egunean bertan, 1979tik gaur arteko alkate eta zinegotzi izandakoak udaletxera gonbidatu zituen Nemehk, hautetsi ohiek euren agintaldietan egin duten lana eskertu eta obrak amaituta lantoki izandakoa zelan geratu den ikus dezaten. Hamabi urtez, udal langileak udaletxetik kanpo egon dira, baina, alkatearen esanetan, ez diote lan egiteari utzi: «Haien konpromisoari esker, Bermeok ez dio sekula funtzionatzeari utzi».
Bermeoko Herri Babeseko koordinatzaile Jon Ojangurenek ere egin zuen berba ekitaldian. 2013a baino lehen ere, hiribildua sarri hartu du suak, boluntarioen buruak gogoratu duenez: 1297an, 1347an, 1360an, 1422an, 1503an eta 1722an. Duela hamabi urtekoa zelan bizi izan zuen kontatu zuen. Bizilagunak 03:15 inguruan ohartu ziren sua piztu zela. 03:20an jaso zuten alerta Herri Babesekoek, baina, Ojangurenen arabera, «zalantzan ipini zen informazioaren egiazkotasuna», eta ez ziren sutera joan. SOS Deietan 03:35ean jaso zuten abisua, eta Gernika-Lumoko foru suhiltzaileak 04:00etan ailegatu ziren. «Gernikako suhiltzaileek galdetu zuten ea zergatik ez geunden han herriko suhiltzaile boluntarioak. Edozein sutetan, azkar erantzutea oso garrantzitsua da. Autokritika egin behar dugu». 04:10ean batu ziren boluntarioak.
Autokritikaz gain, kritika egin gura izan du Ojangurenek, eta 2013tik hona agintean egon diren udal gobernuei kontuak eskatu dizkie. Sute hartan ikasitakoan oinarrituta, hainbat neurri eskatu zizkien Bermeoko Herri Babesak, baina, koordinatzailearen arabera, urteak pasatu diren arren ez dituzte ezarri.
Lurra eta itsasoa
Arkaitz Izarra arkitektoak azaldu zizkien egungo eta lehengo alkate eta zinegotziei zaharberritzearen nondik norakoak. Begoña Tavera eta Ramon Garai arkitektoekin diseinatu zuen zaharberritze proiektua. Tavera eta Garai hil egin ziren, eta Alexander Aranburu udal aparejadorearekin bukatu du lana Izarrak. Arkitektoaren arabera, Bermeo zaharra eta berria uztartzen ahalegindu dira, eta bermeotarrek lurrarekin eta itsasoarekin duten lotura da udaletxe berrituaren ardatza.
Bereziki, sarrerako atea nabarmendu du Izarrak; Garaik diseinatu zuen. Han daude islatuta Bermeoko andre bat eta gizon bat, eta haien bihotzean, itsasoa. Baita arraun bat, San Juan portaleko arkua eta Gaztelugatxerako zubiaren begiak ere. Bermeo zaharretik berrirako pasabidea izan gura du.
