Hiriak eta urteak

Munduari hemen Gasteiz deritza

Gasteiz Paris Amsterdam edo Bera

hiriak ez baitu izen bakarra

nonahi izanagatik berbera

aldatu egiten dira izenak

kale plaza eta etxeen tankera

nehoiz ez da aldatuko ordea

hiriaren gurari egarbera

egarriak dago eta goseak

euri-jasak ere ez du asetzen

ezta lasaitzen ere legeak

alferrik ditu hormak eta ateak

giltzarrapoak ez du gerizatzen

nahitaez eginen du bereak

Hemezortzi urte pasatu dira Xabier Montoia idazle eta kantariak Bingo bere azken poesia-lana plazaratu zuenetik. Denbora horretan eleberriak eta ipuinak argitaratu ditu, baina, berak aitortzen duen bezala, noiztenka poesiak bisita egiten dio. Liburu hau azkeneko bi urteetako "bisita" horren emaitza da.