Ziburuko plaza euskara hutsez biziaraziko dute laugarrenez

Euskara hutsez bete eta biziaraz ditzagun plazak! lelopean iragango da Ziburuko (Lapurdi) laugarren Euskal Liburu eta Disko Azoka (Lapurdi). Ekainaren 3an izango da, Ziburuko plazan. Jendeari egunosoa euskaraz bizi eta gozatzeko parada eskaintzea du xede azokak, eta, horretarako, «euskara hutsezko» programazioa prestatu dute antolatzaileek. Ziburuko Baltsan elkarteak eta Argiaastekariak sortu dute egitasmoa, eta atzo egin zuten azokaren aurkezpena, Baltsan elkartearen egoitzan.

Azken hiru urteetan bezala, programazio zabalaz gozatzen ahalko da egun osoan. Haurrentzako ikusgarriek, bertso marrazki inprobisazioek, umorezko saioek, mahai inguruek, kontzertuek eta liburu aurkezpenek osatuko dute, besteak beste, egitaraua. Guztira 36 argitaletxe egongo dira bertan, antolatu zen lehen azokan baino hogei argitaletxe gehiago. Idazleak eta musikariak ere izango dira, gainera, bertan. Azoka «mamitzen» ari dela eta, pozik agertu dira antolatzaileak.

Joan den urtean azoka hiru gunetan antolatu zuten; aurtengoan, baina, bost gune izango direla jakinarazi dute antolatzaileek. Berritasun nagusietarik bat arratsaldea alaituko duen kontzertu gunea izango da. «Liburuek ez ezik, diskoek ere badute garrantzia, eta haiei leku handiagoa eman nahi izan diegu», azaldu du Jenofa Berhokoirigoin Argia-ko kazetariak.

Bigarren gune berrian garrantzi berezia eman nahi izan diete gazteei.«Erakusketan parte harraraziz, euskal diskogintza eta literaturarekiko interesa piztu nahi diogu gazteriari; espero dugu horrela hazi batzuk ereitea biharko irakurle eta sortzaileak ukaiteko», adierazi du Ladix Arrosagarai Baltsango kideak. Azoka aitzakiatzat hartuta, lanketa berezi bat egin du elkarteak Ziburuko Piarres Larzabal kolegioko ikasle batzuekin eta Baionako Etxepare Lizeoko adar profesionaleko ikasleekin. «Literatura zaharren gauza bat ez dela erakutsi nahi diegu; liburuen bitartez bidaiatzea eta amets egiteadenon gauza da», azaldu du Arrosagaraik.

Bilakaera baikorra

Berhokoirigoinen arabera, gero eta toki gehiago hartuz joan da azoka urtez urte: «Lehenengo urtean, 150 metro karratuko erakusketa zen; aurten, berriz, 450 metro karratukoa». 1.000 bisitari inguru bildu ziren iazko azokan, eta 118 disko eta 729 liburu saldu. Azoka handituz badoa ere, «txikia» dela oraindik ere nabarmendu du Berhokoirigoinek. Handituz jarraitu dezala nahi dutela adierazi zuen ondotik. «Balio eta giro bat sortzen du guretzat garrantzitsua dena». Horregatik, hain zuzen, euskal herritar ororentzako euskara hutsezko ekoizpenen azoka izatea nahi dute aurrerantzean ere. «Bidasoko bi aldeetako herritarrak batu nahi ditugu Ziburuko plazan: antolatzaileak, argitaletxeak, idazleak, musikariak eta bisitariak».

Euskararen egoera «larria»

Antolatzaileak, halaber, kezkatuta agertu ziren euskararen egoerarekiko. «Euskararen egoera larria da azken inkesta soziolinguistikoak frogatu bezala», azaldu duArrosagaraik. Oroitarazi zuen gaitasun eskasa dagoela, baina baita euskara hutsez solastatzeko aukera falta ere. Bide horretan, arnasguneak ugaritu behar direla aldarrikatu zuen. Hain zuzen ere, Ziburuko Azokak behar horri erantzuten diola adierazi du Fanny Lascube Ziburuko hautetsiak: «Egun horretan bermatuta egongo da euskara, euskaraz aritzeko eta bizitzeko aukera emango baitzaio jendeari».

Doinueleren barruan, Euskal Herriko beste zortzi herritako euskara hutsezko plazekin saretuta daudela azaldu dute, azkenik, antolatzaileek: «Euskara hutsezko ekinaldiak ez dira bakanak, eta elkarri josiz indartuko dugu elkar».