Zeidfest jaialdiak ederra izan nahi du aurten ere, laugarrenez

Pandemiaren ziurgabetasun betean, eta artean itxialdia indarrean zela, Zeinen ederra izango den kanta sortu zuen Pello Reparaz musikariak. Abesti horri tiraka, handik bi urtera egin zuten lehen aldiz Zeinen Ederra Izango Den jaialdia, «bizitza» ospatzeko asmoz. Arrakasta itzela izan zuen, eta lehen bultzada hartatik iritsi da jaialdia gaur arte: larunbatean izango da Zeidfest Gaztea jaialdiaren laugarren aldia, eta «gogotsu» daude antolatzaileak.

Barakaldoko BEC erakustazokan (Bizkaia) milaka ikusle biltzea espero dute. Oraindik sarrerak erosteko aukera dago www.zeidfestgaztea.eusjaialdiaren webgunean, eta egunean bertan baita leihatilan ere. «BEC erakustazoka betetzeko asmoa dugu», adierazi dio BERRIAri Itziar Lamarka jaialdiko komunikazio arduradunak. Muntatze lanetan buru-belarri eman dituzte azken egunak antolatzaileek, eta dena prest izateko azken ukituak fintzen ari dira. BERRIA da festibalaren babesleetako bat.

«Euskal musika eszenaren erreferente» bihurtu da dagoeneko Zeidfest jaialdia, eta laugarren edizioko kartela ere ideia horri helduta ondu dute. Hala, besteak beste, Zea Mays, Iseo & Dodosound, Betagarri, Sune, Dupla, Kai Nakai, Joselu Anayak, Sorotan Bele Gogoan, Ingot, Zilibito Records eta Maria Rivero ariko dira. Ia 30 musika talde eta artista ariko dira jaialdian; Euskal Herrikoak gehien-gehienak, baina baita Herrialde Katalanetakoak eta Espainiakoak ere. 

«BEC erakustazoka betetzeko asmoa dugu»

ITZIAR LAMARKAKomunikazio arduraduna

Eta nazioarteko musikak ere izango du tokia: Crystal Fighters Londresko taldea izango da kartelburua. Nazioarteko talde bat jaialdira ekartzeak «ilusio berezia» egiten diela azaldu du Lamarkak: «Nahasketa berezia da Euskal Herriko talde ezagunek zein berriek nazioarteko talde ezagun batekin kartela osatzea». Nahiz eta Crystal Fighters taldeak ingelesez kantatu, euskal identitate eta unibertsotik nahikotxo edan dutela azpimarratu du jaialdiaren antolatzaileak. Londresko taldeak Euskal Herriarekin duen «lotura berezi» horri garrantzia eman nahi diote hala, eta, horregatik, haiekin batera hainbat euskal artista izango dira oholtza gainean, Zetak taldea tartean.

Agertoki berria eta berritasunak

Ateak 11:00etan irekiko dira, eta jaialdia 12:00etan abiatuko. Egun bakarrekoa da eskaintza, eguerdian hasi eta gauerdia pasatu arte. Bi agertoki nagusi izango dira: Aralarko Dama agertokia, eta Aaztiyen agertokia. Eta, horiekin batera, agertoki bat estreinatuko dute Azoka plazan, formatu akustikoko kontzertuez gozatzeko. Hor arituko dira, akustikoan, Erramun Martikorena, Eñaut Elorrieta eta La Maria. Halaber, parada egongo da talentu berriei bultzada emateko lehiaketako irabazleak oholtzan ikusteko.

Zuzeneko musika emanaldiez gainera, saio bereziez gozatzeko aukera ere izango da, hala nola Atzo da bihar, Ken Zazpi-ren diskoaren erreprodukzio saioa, eta Txanpon baten truke, Alaitz eta Maiderren abestien pintxada. Ana Goitia umorista eta Eleder magoa ere izango dira taula gainean, eta Albina Stardustek eta Divina Comediak Urtaroak ikuskizun berezia egingo dute.

«Nahasketa berezia da Euskal Herriko talde ezagunek zein berriek nazioarteko talde ezagun batekin kartela osatzea»

ITZIAR LAMARKAKomunikazio arduraduna

Aurreko urteetan Hondarribiko (Gipuzkoa) Jaizkibel konpainiak eta Naizen elkarteak egin bezala, larunbatean AEK-k jasoko du jaialdiaren omenaldia; sarrera nagusiko zinta moztuko du AEK-ko Barakaldoko zuzendari Argiñe Sangradorrek. «Jendeari euskara ikasteko modua emateaz gain euskaraz bizitzeko guneak sortzen dituelako omendu nahi dugu», azaldu du Lamarkak. Jaialdiaren asmoen artean bada aisialdirako gune euskaldunak sustatzea ere, eta AEKren helburuak bat datoz haien filosofiarekin: «AEKren balioek gu ere ordezkatzen gaituzte».

Euskaraz eta euskal kulturaz gainera, askatasuna, aniztasuna eta jasangarritasuna dira jaialdiaren balioak, eta, ororen gainetik, giro ona: «Giro osasuntsua du jaialdiak, hori da gure balio nagusia». Lau urte baino ez ditu oraindik jaialdiak—«gazteak gara oraindik»—, eta bidea egiten jarraitzeko asmoa du: «Jendeak interesa baldin badu eta euskal kulturak indartsu segitzen badu, hor egongo gara».