Val Kilmer aktore estatubatuarra atzo hil zen, Los Angelesen, alabak The New York Times egunkariari jakinarazi zionez. Aktoreari eztarriko minbizia diagnostikatu zioten 2014an, baina hura gainditua zuen, eta pneumonia baten ondorioz hil zen atzo.
Kilmer Los Angelesen jaio zen, eta Gerra Hotzari buruzko parodia batekin (Top Secret) estreinatu zen zineman, 1984an.
Nolanahi ere, errekonozimendua urte batzuk geroago iritsi zitzaion. Oliver Stonek zuzendutako The Doors filmean (1991) Jim Morrison kantariaren rola egin zuen, eta lan horri esker arrakasta handia lortu zuen aktoreak. Hamarkada hartan oihartzun dezentekoa izan zuten beste hainbat filmetan ere parte hartu zuen Kilmerrek: True Romance (Tony Scott, 1993), Tombstone (George P. Cosmatos, 1993), Batman Forever (Joel Schumacher, 1995), Heat (MIchael Mann, 1995) eta The Saint (Phillip Noyce, 1997), besteak beste.
Zinemako izar bilakatuta, hurrengo hamarkadetan ere lanean segitu zuen. Hain zuzen ere, 2022an estreinatu zuen bere azken filma: Top Gun: Maverick (Joseph Kosinski).
