Urdaibaiko eskualdean (Bizkaia) Guggenheim museo bat eraikitzeko proiektua ez dela «oso inbaditzailea» iritzi dio Eusko Jaurlaritzako lehendakari Imanol Pradalesek, eta aitortu du museo hori inauguratzea gustatuko litzaiokeela. «Baina gauzak ondo egin behar dira, arinegi ibili gabe, eta halako kultur, ingurumen eta gizarte proiektu bati eragiten dioten auziak bermatuz». Bilbon egin ditu adierazpenok, ekonomiari lotutako foro batean.
Museoak bi egoitza izango lituzkeela ekarri du gogora Pradalesek, Gernikan bata eta Muruetan bestea, eta proiektua tramitazio fasean dagoela eta ez dela «oso inbaditzailea» gaineratu du. «Eskualdeko biztanleei entzuteko, eta hobekuntzak nahiz gomendioak gehitzeko konpromiso instituzional bat dago. Badago aldaketak gehitzeko denbora, eta ez dugu arinegi jokatuko», ziurtatu du.
