Espainiako Ministroen Kontseiluak onespena emanda, aurrerantzean posible izanen da trikiti eskolak goi mailako musika ikasketetan izatea. Orain arte ez zen horretarako aukerarik, eta ikasketa maila apalagoetan baizik ezin zen irakatsi musika instrumentu hori. Aldiz, langa hori gainditzen ahalko dute orain: trikitiari loturiko espezialitatea sortuko dute propio.
Emandako informazioaren arabera, eskea Espainiako Hezkuntza Ministerioak bultzatuta ailegatu da Ministroen Kontseilura. Errege dekretu gisara heldu da, eta, organoak dokumentu horretan jaso ditu trikitia goi mailako ikasketetan irakatsi ahal izateko bete beharko diren hainbat irizpide. Aurrerantzean, horiek oinarri hartuta sortu beharko dituzte trikitiarentzako ikasketa planak kontserbatorio edo goi mailako bestelako eskoletan.
Ikusi gehiago
Espainiako Gobernuak nabarmendu duenez, espezialitatea sortzearekin batera aitortza eginen zaio trikitiak historian izaniko garrantziari ere. «Aitortuko da trikitia dela euskal musikaren elementu nagusietako bat, eta, pauso honekin, bide emanen zaio proiekzio sozial eta profesionala handitzeari, izan tradizioari begiratzean edo izan soinu lengoaia berriak jorratzean». Gaineratu dutenez, trikitiaren gaineko ikerketari ere bultzada emanen zaio aurrerantzean.
