Gasteizko Jazzaldiak Brasilgo musikari eskainiko dio Mendizorrotzako azken gaualdia: Toquinho izango da artista nagusia, eta, harekin batera, Dora Morelenbaum eta Yamandu Costa artisten kontzertuek osatuko dute uztailaren 19ko programa. Gasteizko 48. Jazzaldia izango da aurtengoa. Mendizorrotzarako sarrerak eta abonuak bihar jarriko dituzte salgai,Jazzvitoria.com webgunean, 10:00etan. Jose James, Jazzmeia Horn, Al Di Meola eta Kenny Barronen kontzertuak ere agindu dituzte Gasteizko Jazzaldiko antolatzaileek.
Bossa novak eman duen izenik garrantzitsuenetako bat da Toquino; Caetano Veloso, Chico Buarque eta Gilberto Gil garaitsukoak ditu, eta, haiekin batera, Brasilgo musika jazzarekin hibridatuz berritu dutenen belaunaldia osatzen du.
Aquarela abestiaren egileak ia sei hamarraldi daramatza musikan. Hamalau urte zituela, gitarra jotzen ikasten hasi zen Paulinho Nogueira musikariarekin, eta geroztik ibilbide oparoa egin du: 40 disko baino gehiago eman ditu argitara, eta sarritan egin ditu nazioarteko birak. Horri esker, jazz tropikala eta bossa nova hedatu ditu munduan barrena.
Toquinhorekin batera, Yamandu Costa gitarra jotzaileak ere kontzertua joko du uztailaren 19ko gaualdian. Costak ezagutzen du Gasteizko Jazzaldia, duela bi urte ere bertan izan baitzen, bere zazpi kordako gitarra eskuetan. Toquinhorekin ere aritua da lehenagotik: bien kolaborazioak biltzen dituen Bachianinha diskoak album instrumentalik onenaren latin Grammya erdietsi zuen 2021ean.
Dora Morelenbaum abeslari eta konpositorearen saioak osatuko du gaualdia. Brasilen azken boladako ahotsik txalotuenetako bat den horri familiatik datorkio talentua: ama abeslari aparta da, eta aita biolontxelo jotzaile eta musika moldatzailea. Morelebaumek umetan sarritan ikusi zituen gurasoak Caetano Veloso, Gal Costa, Tom Jobim eta gisako artistekin lanean.
Orain baino lehen, Bala Desejo taldearekin aritu da Morelenbaum. Bere bakarkako lehen lana, Pique, 2024an eman zuen argitara. Bertan funkya, soula eta jazza indie pop estetikaz lotzen ditu artistak. Gasteizen Guilherme Lirio (gitarra), Daniel Conceiçao (bateria) eta Guto Wirti (baxua) musikariarekin osatuko du taldea.
