Shibari

2020an Ondarroan sortutako hirukotea dugu Shibari. Duela bi urte atera zuten estreinako EPa, eta orain beste lan luzetxoago batekin itzuli dira. Berriz ere, zuzenekoetan eskaintzen duten indarra eta oldarkortasuna era fidelean islatu dituzte. Zati elektroakustikoak tartekatzen dituen Bizi mihisea, baina, diskoko soinuaren adierazgarria dugu: zati pausatuek post-hardcore eztandari bidea ematen diote laster, eta azken horrek sortzen duen efektua biderkatu. Kantuei entitatea emateko asmo markatua nabari da lan osoan, eta ahotsaren garraztasunari kontrapuntua ematen dioten pasarte musikalek asko janzten dituzte kantuak. Nahi gabe tatuatuak eta Maite zaitut, esate baterako, bereziki gomendagarriak dira.