Ruben Ruiz (Gasteiz, 1973) irakasle eta idazlearen Pellokeriak ipuin bildumak irabazi du 2024ko Mikel Zarate haur literatura saria. Hala erabaki du Leire Bilbaok, Maribel Aiertzak eta Xabier Mendigurenek osatutako epaimahaiak. 3.000 euroko saria emango diote, eta Elkar argitaletxeak plazaratuko du liburua.
Hainbat ipuin laburrez osaturiko kontakizuna da Pellokeriak, eta denetan Pello izeneko mutikoa da protagonista. Askotariko gaiak agertzen dira ipuinetan, hala nola eskola, familia, bullying-a, zahartzaroa eta beste, eta denetan nabarmentzen dira umorea eta samurtasuna.
Hamaika lan lehiatu dira guztira, eta horien artean Ruizek idatzitako ipuin sorta hautatu du epaimahaiak. Lezamako Udalak (Bizkaia) eta Elkar argitaletxeak abiatu zuten sariketa, euskal kulturako sortzaile eta sustatzaile izandako Mikel Zarateren omenez, eta hamalaugarren aldia bete du aurten. Garazi Kamio Anduaga kazetari, irakasle eta idazleak irabazi zuen iaz, Bikini nobelarekin.
Ruben Ruiz Gasteizen jaio zen, eta Basaburuan (Nafarroa) bizi da gaur egun. Irakaslea da lanbidez, eta hainbat libururen egilea, hala nola Anekdotak haur literaturako ipuin bilduma eta Beti mugan abenturazko eleberria.
