Rock-and-rollaren eta soularen esentzia

The Savages taldearekin dator bueltan Barrence Whitfield kantari estatubatuarra Euskal Herrira. Ez da nolanahiko izena taldearena, Whitfielden emanaldiak ere basatiak izaten baitira, jatorrizko rock-and-rollaren eta soularen ospakizun sutsuak bezain dibertigarriak.

1980ko hamarkadan hasi ziren Whifield eta The Savages —besteak beste, The Lyres taldeko kideek osatua— rock-and-roll primitiboaren eta musika beltzaren artean mugitzen den proposamen dantzagarria lantzen, eta berehala lortu zuten sona handia, batik bat zuzenean eskaintzen zuten ikuskizunak bultzatuta.

Euskal Herrian behin baino gehiagotan izan da Whitfield, eta Pettirekin disko bat ere grabatu zuen 2009an (Petti eta Barrence Whitfield, Bloody Hotsak).

Gasteizen, Black Widows AEBetako surf-rock-punk taldea ariko da aurretik.