Ibilbide zinematografiko oparoko izarra izan zen Welch. Hain zuzen ere, Elvis Presleyren eskutik heldu zitzaion zinemako bere lehen aukera, Roustabout film musikalean. Bertan figurante gisa aritu bazen ere, zinema munduko ateak ireki zizkion horrek. Izan ere, urte hartan bertan, beste pelikula batean antzezteko aukera suertatu zitzaion: A House Is Not a Home filmean, Shelley Winters, Robert Taylor eta Cesar Romero aktoreekin batera. Gainera, garai hartan, agerraldi laburrak ere egin zituen Bewitched eta The Virginian telesailetan.
Nolanahi ere, 60ko hamarkadaren bigarren erdian estreinatutako bi filmi esker bilakatu zen izar Welch; hain zuzen ere, Fantastic Voyage eta One Million Years. Ordutik aurrera, bere garaiko zuzendari onenetako batzuen filmetan parte hartu zuen, eta 1975ean emakumezko aktore nagusi onenaren Urrezko Globoa irabazi zuen, The Three Musketeers filmean egindako lanagatik. Richard Lesterrek zuzendutako film horren segidan ere parte hartu zuen: The Four Musketeers
Horiek ez ziren, baina, aktore gisa aritu zen film bakarrak izan. Izan ere, Frank Sinatrarekin batera, Lady in Cement (1968), Hannie Caulder (1971) eta Fathom (1967) filmetan ere parte hartu zuen aktoreak. Bere aktore ibilbidearen porrota 1982an izan zen, Cannery Row pelikulatik kanporatu zutenean. Gerora, baina, hainbat film arrakastatsutan parte hartu zuen, nahiz eta haietako askotan rol txikiak bete.
Azken lanak
Zineman egin zituen azken lanetako batzuk Tortilla Soup eta Legally Blonde komedia arrakastatsua izan ziren. Pantaila handian egin zuen azken agerpena, berriz, How to Be a Latin Lover filmean egin zuen, Salma Hayek eta Rob Lowe artistekin egindako komedi batean.
82 urterekin zendu da Welch. Hain justu, familiak baieztatu du gaur haren heriotza, eta «gaixotasun labur baten eraginez» gertatu dela jakinarazi du.
