Oinazeari abestuz

«Orain, nire maitea, joan egin zara, eta kez inguraturik utzi nauzu. Orain, nire maitea, alde egin duzu, eta nire bihotza hutsik dago, kez beterik». Gloriaren oinaze hitzak dira; maitale izandako Takk galtzean sentitutako hutsa adierazten dute. Noiz edo inoiz mundu orok bere larruan sufritu duen maiteminaren inguruan ondu du Khea Ziaterrek Gloriaren kantua, amodio eta desamodioaren arteko jolas mingarrian. Durangoko San Agustin kulturgunean estreinatuko dute gaur, 20:00etan.

Alex Gerediagak bizipen pertsonal batetik planteatu nahi izan du obra, nahiz eta gero autobiografiarik egin ez duen. Leire Ucha eta Na Gomes Gloria eta Takk dira antzezlanean, eta harremanaren une gorenak zein horien hondarren itzalguneak agertuko dituzte, kantuz eta dantzaz tarteka, eta hitzez gehienetan.

Minari gaina hartzeko helburuz, atzera begiratuko du aurrena Gloriak. Eta oroitzapenak errenkan etorriko zaizkio, bata bestearen segidan. Takki lotzen zaizkio denak. Eta Takkek agerraldia egingo du oholtzan, Gloriaren barnean oraina den iragana hezurmamituz.

Bien arteko elkarrizketak eta nork bere aldetik izango dituen bakarrizketak Alex Gerediagak idatzi ditu. Alabaina, ez du aurretiko gidoirik landu, hau da, obra agertokian entseatu ahala joan da testuak osatuz, gainerako elementu dramaturgikoez erabakiak hartuz joan den heinean. Gaztelaniazko bertsioa iazko azaroan aurkeztu zuten, Bilboko BAD jaialdian. Eta lan hartarako ondutako testuak Jon Gerediagak ekarri ditu euskarara, Gloriaren kantua-n.

Khea Ziaterren aurreneko lana da, baina ez da talde berria. 1998an sortu zen, Bilbon. Mina espazioan hasi zuten ibilbidea, harik eta Ander Lipusekin eta beste batzuekin Antzerkiola Imaginarioa sortu zuten arte.

Haatik, orain Khea Ziater berreskuratzea erabaki du Gerediagak, bestelako erreferentzietan oinarritutako antzezlanak egiteko asmoz. «Antzerkiola Imaginarioan XX. mendeko abangoardiak eta antropologia teatrala lantzen ditugu, eta lan honetan zinemagintzako erreferentziak hartu ditugu. Esperimentu bat izan daalde horretatik», azaldu du Gerediagak.

«Oso zinematografikoa»

Zinemara jo du erreferentzia bila, eta David Lynchen atmosferak eta urtzeak, Jim Jarmuschen pertsonaien estetika eta Jean-Luc Godarden zenbait elkarrizketa jaso ditu, besteak beste. Horrenbestez, antzezlanaren estetika eta egitura «oso zinematografikoak» direla adierazi du Gerediagak.

Zinemaren bidez, «zenbait aurkikuntza» egin ditu. «Beti izan naiz gatazkan antzerki naturalistarekin. Ez nuen modurik ikusten gauza intimoak esateko hirugarren lerrotik atzera daudenei. Oraingoan anplifikazio mekanismoak erabili ditugu barruko sentimen horiek behar bezala publikoari helarazteko». Zinemaren berezko moduek lagundu egin diote erronkari gaina hartzen.

Halaber, musikak itzal handia du obran, Gerediagak dioenez. Batik bat 60ko hamarkadako taldeen abestiak tartekatuko dituzte obran. Zuzenean ere abestuko dute. Esaterako, Takkek Leonard Cohenen I'm Your Man kantuaren bertsio bat egingo du gitarrarekin.

Durangon estreinatu ondotik, Bilboko Kafe Antzokian (igandean, 19:00etan) eta Zornotza aretoan (apirilaren 15ean, 20:00etan)emango dute Gloriaren kantua.