Gaur arratsaldean, Donostiako Koldo Mitxelena kulturunean egindako ekitaldi batean, Harkaitz Millan Gipuzkoako Foru Aldundiko Kultura diputatuak Nerea Arrien idazleari eman dio VI. Xabier Lete poesia saria, Zoonomia lanarengatik. Sari hori irabazi duen lehen emakumea da Arrien.
Arrienek, Millanek, Garazi Navas akordeoi jotzaileak eta epaimahaikide batzuek parte hartu dute ekitaldian, eta Jose Luis Padron idazleak aurkeztu eta gidatu du saioa.
2017an, Arrienek Hirutter nobela argitaratu zuen, eta, iaz, Jende likidoa narrazio liburua. Haur eta gazte literaturan, Pentsatzeko txokoa argitaratu zuen 2015ean, Lizardi saria irabazi ondoren, eta Atrapa eguna (2017), Eskola hodeian (2018) eta Etxegabetuak (2020) liburuak ere egin ditu. Lan guztiak Erein argitaletxearekin atera ditu.
