Aurten EHZ Euskal Herria Zuzenean festibalean joko duten beste zazpi musika talderen izenak jakinarazi dituzte: Bengo, Inertzia, Marta, Naxker, Polylogue From Sila, Tapia ta Leturia eta Txaptrax taldeek kontzertu bana emanen dute ekainaren 27tik 29ra artean. Bigarren aldiz, Arberatzen (Nafarroa Beherea) eginen dute jaialdia. Otsailaren hondarrean eman zituzten aurtengo edizioari buruzko lehenbiziko xehetasunak, eta gaur zabaldu dute informazioa.
Oraingoz, EHZn ariko diren hamabi musika talderen berri eman du festibalak. Gaur jakinarazitakoez gainera, honako talde hauek zeuden iragarrita aurrez ere: Auhen, Marte Lasarte, W!zard, Radio Byzance eta Maskak. Sarrerak festibalaren webgunean eros daitezke; maiatzaren 6ra bitarte, hiru egunetarako bonuak 53 euroan dira salgai. Eta, hain zuzen, epe hori bukatutakoan zabalduko dute eguneko sarrerak erosteko bidea.
Hala eta guztiz, ohi denez, sarrerarik erosi gabe ere gozatzen ahalko da zenbait emanaldiz. Otsailean iragarri zuten Cie Choari eta Queer Falafel artisten ikuskizunak izanen direla herriko plazan, dohainik, eta gaur jakinarazi dute beste hauek ere badirela egitarau berean: Oona Doherty, Ane Lindane, Ahmed Eid & Ilyf band, Zetkin eta Bacano Banda.
