'Mugitu' kaleratu du Haitzamak, kantu latinoen bertsioekin

Etorkinek «musikarako eta bizitzarako alaitasun berri bat ekarri digute» Haitzama Bizkaiko taldearen ustez. Etorkin horien ekarpena aitortzeko eta «musika bero hori geureganatzeko» sortu berri du Mugitu diskoa Hego eta Ertamerikako hainbat kantu ezagun euskaratuz eta bertsioak eginez: Devórame otra vez, Dançando lambada, Bilirrubina, Me gustas mucho, Sopa de caracol eta beste hainbat kanturen bertsioekin osatu dute lan berria Mikel Leibarrek (ahotsa eta teklatuak), Iñigo Agirrezabalak (gitarra eta ahotsak), Xabi Barrenetxeak (baxua), Julen Apezetxeak (bateria) eta Nerea Solatxik (trikitia eta ahotsak). Duela bi urte Eguzkiaren zain argitaratu zuten, bikoteentzako eta euskal dantzei reggaea, ska eta rock doinuak batuz.