Sergio Prego eta Vito Acconci artisten erakusketa aurkeztu dute gaur Bilboko Guggenheim museoan. Diskrezioz jokatu nahi izan du Miren Arzalluz Bilboko Guggenheim museoko zuzendariak eguneko albiste nagusia hori izan zedin, baina zuzendari postua hartu duenetik egin duen lehen agerraldi publikoa ere izan da gaurkoa, eta arreta piztu du horrek ere. Guggenheim Urdaibai Stop plataformako kideek protesta antolatu dute eraikinaren kanpoaldean, esaterako, eta bilkura bat ere eskatu diote zuzendari berriari, proiektuari buruz duten iritzia helarazteko. Hori batetik, eta, bestetik, kazetariek ere etorkizunerako dituen asmoei buruz galdetzeko baliatu dute prentsaurrekoa. Landuko dituen ildoez aritzeko oraindik «goizegi» dela esan du Arzalluzek, eta bere asmoen berri emateko denbora izango dela ziurtatu du. Halere, onartu du, «beste gauza batzuen artean», Urdaibaiko museoaren gaia ere mahai gainean dagoela, eta prest azaldu da plataformako kideak entzuteko. «Gaur, hor kanpoan daudela ere, errespetu osoz entzuten ditut, eta entzuteko eta zabalik egoteko jarrera hori hor egongo da beti».
Ikusi gehiago
Arzalluzek hilabete eman du Juan Ignacio Bidarte zuzendari ohiarekin batera, erakundearen nondik norakoen berri jasotzen, eta, ofizialki, apirilaren 1ean hartu zuen zuzendari postua. Horregatik, lanean «hiru egun» daramatzala zehaztu du kazetarien aurrean egindako agerraldian, eta esan bere asmoen eta landu nahi dituen ildoen berri aurrerago emango duela. «Etorkizunerako ildo nagusiak jakinaraziko ditugu, baina oraindik hausnarketa horretan nago talde guztiarekin batera. Laster etorriko da».

Edonola ere, lehen agerraldian ere igarri da aldaketarik. Euskarak orain arte izan duena baino presentzia nabarmen handiagoa izan du aurkezpenean, esaterako. Arzalluzek euskaraz eman ditu Sergio Prego eta Vito Acconci artisten lanek osatutako You erakusketari buruzko lehen azalpenak, eta euskaraz erantzun ditu kazetariek euskaraz egindako galderak ere.
«AEBetan zentsura moduko bat sustatzen saiatzen ere ari dira aniztasunaren eta inklusioaren esparruetan. Hori agerikoa da jadanik»
MIREN ARZALLUZBilboko Guggenheim museoko zuzendaria
Arzalluzek onartu duenez, zaila da oraindik Donald Trumpek ezarritako muga zergek izango duten eragin zehatzari buruz ere zerbait esan ahal izatea. Baina aitortu du kulturgintzan jadanik hasiak direla aldaketak igartzen, AEBetako presidentearen agintea hartu zuenetik. «Erabakiek eragin handia izango dute kultur erakundeetan; jadanik badute. Ez soilik AEBetako kultur proiektuen finantzaketari dagokionez, horrez gainera, zentsura moduko bat sustatzen saiatzen ere ari dira aniztasunaren eta inklusioaren esparruetan. Hori agerikoa da jadanik».
AEBetako bisitariek osatzen dute egun museoko bisitari guztien %6a, eta, Trumpek ezarritako muga zergen ondoren ere, jendea Bilbora joango dela espero du Arzalluzek. «Orain artean bezala, aurrerantzean ere etorriko direla espero dut».
Urdaibaiko proiektua
Hamarnaka pertsona bildu ditu Guggenheim Urdaibai Stop plataformak museoaren kanpoaldean. Louis Bourgeois artistaren eskulturaren inguruan egin dute bilkura, eta Salbeko zubian ere pankarta erraldoia zintzilikatu dute euskaraz eta ingelesez idatzitako leloarekin: «Urdaibai ez dago salgai». Arzalluzi bilkura bat eskatu diotela gogorarazi dute plataformako kideek, eta Urdaibaiko Guggenheim museoaren proiektua herritarren esku jar dezaten ere eskatu dute. Hain zuzen ere, Arzalluzi berari ez ezik, proiektua babesten duten Bizkaiko Foru Aldundiari eta Eusko Jaurlaritzari ere zuzendu diote eskari hori: «Atera dezatela proiektua lehenbailehen».