Maria Concepcion Astola zendu da, 95 urte zituela. Bera izan zen Gerediaga elkarteko presidentea lehen urteetan. 1965eko ekainaren 7an erregistratu zuten elkartea, Durango Merinaldeko Adizkideen Gerediaga Elkartea izenarekin, Bizkaian. Eta presidente karguan Maria Concepcion Astola durangarra jartzea erabaki zuten. Urtebetez izan zen elkarteko buru, 1965-1966 aldian.
«Hasierako urtean, lan asko zegoen egiteko, bazkideak egitetik hasita. Denbora gutxian, 1000tik gora ere lortu zituzten», ekarri du gogora elkarteak. Besteak beste, lehen urte hartan «entzute handiko ekimenak» jarri zituztela martxan nabarmendu du, hala nola arte modernoari buruzko erakusketa eta Durangoko Euskal Liburu eta Disko Azoka.
2015ean, Gerediaga elkarteak mende erdia bete zuenean, urteurreneko ospakizunetan parte hartu zuen Astolak. Durangoko Azokan Argizaiola saria eman zieten garai hartan azoka egitea erabaki eta proiektua abian jarri zutenei, eta saria emateko ekitaldian izan zen, garai hartako beste hainbat sustatzailerekin batera.
