Loratzeko arnasgune berri bat

Berrogei abesti ideia baino gehiago ditu karpeta batean gordeak. Bukatu ez dituen abestiak dira; aurrerago bukatuko ditu, agian. Bitartean, Loratzen izeneko EP bat kaleratu du Eider Saezek (Lazkao, Gipuzkoa, 1998). Bere lehenengo bakarkako proiektu musikala da hori; Nogen taldeko abeslaria izan da lau urtez, eta, orain, bere bide propioari ekin dio, Eider izenpean: «Geldialdi bat egin nuen pentsatzeko zein norabide hartu nahi nuen, jakiteko ea musikarekin jarraitu nahi nuen edo ez», adierazi du abeslariak.

Betiko lagunekin elkartu, eta letrak idazten hasi zen. Maitasunaz, laguntasunaz eta prozesu horretan guztian bere buruarekin izan dituen barne borroka eta zalantzez idatzi du. Hala konturatu ziren bazegoela disko bat betetzeko adina mami letra horietan.

«Ahalduntze pertsonal» eta «erronka»batez hitz egiten du Saezek diskoa osatzeko prozesuaz ari denean. Nola bere buruari erakutsi nahi zion bazela gai horrelako proiektu bat «emaitza txukun batekin» ateratzeko, baita bakarka ere. Testura eta soinu desberdinak esploratu nahi izan ditu bide berri horretan, eta Loratzen transformazio prozesu horren emaitza izan da: «Asko ikasi dut Nogenen egon naizen lau urteetan, bai pertsonalki eta bai musikalki, eta uste dut emaitzan ikusten dela aurretik ikasi dudan guztia», adierazi du abeslariak.

Lehen aldia da Saezek gaztelaniaz abesten duela profesionalki. Nogenekin ere abestu izan du zer edo zer, baina ez da ohikoa izan haren ibilbidean. «Zalantzak eduki nituen gaztelaniazko abestiak sartzearekin». Egin izan dioten galdera ohikoetako bat izan da hizkuntza aldaketarena, baina oso argi du erantzuna: «Abestiak horrela sortu dira, naturalki. Musika ulertzen dut musika bezala, hizkuntzatik harago. Hau musika da, hizkuntza unibertsala». Diskoko sei kantuetatik hiru euskaraz dira, eta gainerakoak, gaztelaniaz.

Hasieran ez zegoen disko bat ateratzeko intentziorik bere buruan. Idaztea betidanik izan da bere askatzeko modua, bai testu formatuan eta baita abesti formatuan ere. Oraingoan, berriz, gauza berriak probatu nahi izan ditu, betiko martxa galdu gabe. EPa nahiko poperoa dela adierazi du, popetik eta rock alternatibotik edan baitu. Olivia Rodrigo abeslari estatubatuarra izan du inspirazio iturri, ahotsaren eta instrumentuen distortsioari dagokionez. Abesti tristeak gailentzen dira diskoan, idazten ibili zen garaia bera ez baitzen bere bizitzako onena, baina gauza positiboetan enfokatuz atera ziren abesti alaiak. «Idazteko garaian eduki nituen sentimenduak ikusten dira diskoan. Melodia alaiak dira, baina barrutik egindako disko bat da».

Bere bakarkako ibilbidea hastear zegoenean gaizki pasatu zuela aitortu du abeslariak. Beldurrak gainezka egiten bazion ere, jendearen harrera oso ona izan dela esan du: «Mezu asko jaso ditut, oso positiboak. Jendea oso jatorra izan da». Beste ikuspuntu batetik ikusten ditu gauzak orain. Hainbat fase pasatu ditu diskoa egiten hasi zenetik gaur arte: «Ez nion inori esan diskoa egiten ari nintzela. Ez nuen nahi inork jakiterik». Diskoa ateratzean egin zion beldurrak gainezka. «Baina bakarka lan egite honek beldurrak gainditzen erakutsi dit». Izan ere, aurrera egiteko eta bere ametsa betetzeko gogoa beldurra baino handiagoa zen: «Diskoa oso zaurgarria da, eta beldurra ematen zidan nire alde zaurgarri hori erakusteak». Jendeak zer pentsatuko zuen zeukan buruan denbora guztian, eta diskoa kaleratzeak asko lagundu dio, haren hitzetan.

Bere abestiak ez dira hain bereak, dagoeneko. Jendeak bideoak bidaltzen dizkio sareetatik, bere kantuak abesten: «Beste ikuspuntu batetik ikusten dira kantuak beste pertsona baten ahotsean, eta hori oso guaia da. Jada ez zara zu bakarrik». Bere kantuen bertsioak entzutea «surrealista» egiten zaiola aitortu du abeslariak, barrez. «Jendeak nire abestiak entzun eta ikasteko denbora hartzea izugarria iruditzen zait».

Musika arnasgune bat izan da harentzat betidanik. Errutinatik beste mundu batera ihes egiten laguntzen dion gauza bakarrenetarikoa da, bidaiatzearekin batera, eta gustuko du artista eta generoak deskubritzea. «Kontu berriekin» dabilela aitortu du abeslariak: «Genero aldetik, argi daukat ez dela izango, inolaz ere, Loratzen-ekin eraman dudan bide bera». Idatzita dauzkan abesti ideia horiek forma hartuko dute, agian. Berriak etorriko zaizkio, akaso. Luzerako dator Eider, eta loratzen jarraitzeko prest dago.