Dantzariaren eta hura inguratzen duten gitarra jotzaileen gorputzek arnasgune eta lasaitasun esparru bat eskainiko dute Myriam Perezen Isiltasuna zizelkatzen dantza emanaldian. Sofia Martinez konpositorearekin batera, koreografiaren eta musika konposizio garaikidearen arteko hurbilketa sortu du dantzari eta koreografoak. «Hausnarketarako eta elkarrizketarako» momentuak izango direla esan du. Bihar estreinatuko du, Donostiako Tabakalerako Patioa espazioan, bi emanalditan: 18:30ean eta 20:00etan. Horrez gainera, ostiralera bitarte beste hiru emanaldi ere antolatu ditu Donostiako 85. Musika Hamabostaldiak antolatutako Tabakalera Dantzan programaren barruan.
Perez da aurtengo Tabakalera dantzan zikloaren bosgarren edizioko egoiliarra, eta, Patrick Alfaya Hamabostaldiaren zuzendariaren hitzetan, zikloak egile dantzaren alde egin du.
Egitura organikoak arkitektura espazioekin jolastuko dira etzi, Hotel Col.lectiu Escenic taldearen saioan. Tabakalerako eskailera nagusietatik abiatuko dira eraikineko beste espazioetara. Aquí pieza Lorena Nogal koreografoarekin batera sortutako lana da.
Berrinterpretazioa
Ostiralean bi dantza pieza izango ditu programak. Javier Arozenak edertasunari hitz egingo dio Schwanengesang dantza saioan, Tabakalerako Plazan, 19:00etan. Prisma espazioan, Federica Porello italiar interprete eta sortzaileak Bach pieza berrinterpretatuko du; 19:30ean. Maria Muñoz dantzariak 2004an sortu zuen Bach pieza birsortu dute Porellok eta Muñozek. Johann Sebastian Bach konpositorearen musikarekin bat egiten dute dantza horiek.
Lehen eguneko sarrerak ekitaldiaren webgunean daude salgai; Perezek sortutako pieza ikustekoak, alegia. Beste saioetakoak, berriz, doakoak dira.
