Hatortxu Rock jaialdiak Bigarren itzulera eguna izendatu du gaurkoa, azken jaialdian izango diren beste lau talderen izenak eman baitituzte. Hain zuzen, Alaitz eta Maider, Latzen, Afu eta Skatu dira lau talde horiek, denak ere garai batean oholtza gainean ibilitakoak baina agertokiak alde batera utzitakoak. Lakuntzan (Nafarroa) egingo dute Hatortxu Rocken azken aldia, uztailaren 24tik 27ra.
Alaitz Telletxea Tolosak (trikitia) eta Maider Zabalegi Galardik (panderoa) osatzen dute Alaitz eta Maider. Oiartzungo (Gipuzkoa) bikoteak 1989an abiatu zuen musika ibilbidea — partaideek 14 urte baino ez zituzten garai hartan—, eta 2004an utzi zion oholtzara igotzeari. Lehen maketa 1991n plazaratu zuten, eta bigarrena, 1995ean. Lehen diskoak bikotearen izen bera hartu zuen, Alaitz eta Maider (1997), eta 25.000 ale saldu zituzten. Beste bi disko heldu ziren ondotik: Inshala (1999) eta Auskalo (2002). Horietan guztietan triki-pop doinuak landu zituzten.
Latzen Oñatiko (Gipuzkoa) heavy metal taldea 1993an sortu zen, noiz-eta euskarazko heavy metala ordura arte izan ez zuen oihartzuna lortzen ari zenean. Aitor Uriarte (ahotsa), Joxemari Azpitarte (baxua), Iker Martinez de Zuazo (gitarra) eta Gorka Lazkanok (bateria) osatu zuten taldea, eta 1996an argitaratu zuten lehenengo disko luzea, Kontzientzia ala infernua (Oihuka). Latzen talde ezaguna zen ordurako, besteak beste Euskadi Gaztearen entzuleen saria eskuratua baitzuen, baina lehen disko hark are eta gehiago hedatu zuen taldearen izena. Heavy metal klasikoan oinarritutako piezak zeuden lan hartan, eta baita arrakasta handia lortu zuen balada bat ere: Laztana.
Bi urte geroago plazaratu zuten bigarren lana, Ardi larruz (Oihuka), eta, 1999an, taldea desegitea erabaki zuten. «Hirugarren diskoa grabatzera sartzeko prest ginen, eta autoan gindoazen diskoetxearekin azken kontuak egitera, Lekeitiorantz, Angelillorekin elkartzera, Jabiertxo managerrarekin batera. Bidean, beste inongo misteriorik gabe, taldea uztea adostu genuen», esan zuten erabakiaren berri emateko orduan.
2007an, taldea oholtzara itzuli zen, eta hamabost kontzertu eman zituen. Hurrengo urtean, 2008an, Hellmuga diskoa eta DVDa argitaratu zituzten, bira haren lekuko gisa.
Ska eta reggaea
Skatu taldea, bestalde, 2007an sortu zuten, Iruñean, izenak zioen bezala ska musika ardatz izanik, nahiz eta bai punk bai reggae ukituak ere bazituen. Taldeak hiru disko argitaratu zituen 2013ra bitartean: Zortziak bat (Musikherria, 2009), Izana izanen (Musikherria, 2011) eta Lubakitik (Autoedizioa, 2013).
Afu taldea ere azken Hatortxu Rock jaialdirako batuko da. Barañainen (Nafarroa) sortu zen, 2007an, eta reggae eta saltsa doinuak landu zituen batik bat. Hastapenean bertsioak egiten zituzten arren, gerora abesti propioak sortu zituzten, eta bi disko ondu: Zoroak hegaz doaz (2015)eta Larruazalean (2020).
Beste hiru itzulera ere iragarriak ditu lehenagotik Hatortxu Rockek. Otsailaren 4an jakinarazi zuten Never Surrender, Autobus Magikoa eta Buitraker taldeak ere bueltan izango direla jaialdian.
Iazko ekainean adierazi zutenez, aurten izango du amaiera Hatortxu Rockek, eta antolatzaileek iragarri dute «jaialdi historikoa» izango dela. Gaurko iragarpena barne hartuta, 36 musika talderen izenak eman dituzte guztira. Hau da zerrenda osoa: Chuleria Joder, Dupla, Maskak, Burutik, Tribade, Brigade Loco, Ibil Bedi, Añube, Sukena, Sune, Bad Sound, The Lio, Leihotikan, Les Testarudes, Plan B DJa, Su Ta Gar, Trapella DJa, Gatibu, La Jodedera, Kaotiko, Maruxak, Non Servium, Bulego, Nogen, Tatxers, Skabidean, Streetwise, Banda Bassotti, Gozategi, Eñaut Elorrieta, Los Zopilotes Txirriaos, Betagarri, Never Surrender, Autobus Magikoa, Buitraker eta Latzen.
Erlazionatuta
