«Ez dute guk bezala abestuko», esan zuen Iñaki Tolaretxipik, Landarbaso abesbatzako zuzendariak, duela egun batzuk, Asiako Grand Prix finalaren inguruan galdetzean. Euren aurkariek ez zuten eurek bezala abestu, ez. Errenteriako (Gipuzkoa) abesbatzak balentria egin zuen asteartean, munduan Grand Prix bat irabazten duen Euskal Herriko lehen korua eta Asiako Grand Prix irabazten duen lehen koru europarra baita: «Oso momentu berezi eta gogoangarria izan zen», adierazi du Miren Agirregomezkorta abesbatzako kideak.
Adierazi dutenez, oraindik kosta egiten zaie Balin (Indonesia) gertatu zena onartzea: «Kontziente gara, bai, baina arrazionalki bakarrik. Ez dugu irabazi dugula sinesten». Astearte eguerdian (hemengo 08:00etan) egin zuten Asiako Grand Prix finala, Baliko Giri Nata Mandala aretoan. Indonesiako aretorik handienetariko bat da hori, eta Landarbasorentzat «erronka handia» izan da bertan irabaztea: «Aretoa erraldoia da, eta hori dena ahotsarekin bakarrik betetzea oso zaila da». Hala ere, esan dutenez, musika hobeto helarazteko aukera izan zutela iruditu zitzaien.
«Askotariko» programa bat eskatu zieten finalerako: «Iñakik, zuzendariak, oso ondo asmatu du», adierazi du Agirregomezkortak. Estilo desberdineko eta «teknikoki oso zailak» diren bost obra eraman zituzten, horien artean euskarazko bi. Bost obra horietatik bi, Filipinetako eta Indonesiako koruek ere, euren aurkaririk gogorrenek, kantatu zituzten. Dena den, horrek ere ez du eragin Errenteriako abesbatzaren gainbehera. Hogei minutuko tartea zeukaten bost obra horiek kantatzeko, eta 18 minutu eta 18 segundotan egitea lortu zuten.
Euforiatik lur hartzera
Baliko Kartika Plaza hotelean izan zen sari banaketa; hala amaitu zen Asiako Grand Prix finala, eta bihar hasiko den Baliko Nazioarteko Koru Lehiaketa abiatu. Landarbasok parte hartuko du horretan ere, bigarrenez. Izan ere, 2019an lehiaketa hori irabazteagatik eskuratu zuten Grand Prixerako sailkatzea. Hiru modalitatetan hartuko dute parte aurten: erlijio musikan, abesbatza mistoetan eta folklorean, eta astearteko garaipena ospatzen duten bitartean, biharko lehiaketarako prestatzen ari dira. «Poztasun eztanda» bat aipatu du Agirregomezkortak. Ez zuten espero epaimahaiak erabakia hain azkar hartzerik: «Errente hitza entzun orduko oihuka hasi ginen denak, elkar besarkatzen. Momentu euforiko bat izan zen».
Pozik daude finala irabazteagatik, baina «oinak lurrean» dauzkate biharko, gauza asko geratzen baitira oraindik prestatzeke. Oraingoan, lasai entseatzeko aukera dute, ordea. 31 orduko bidaia egin zuten Balira iristeko, eta, horrek dakarren nekea gainean zutela, Asiako Grand Prix finala irabazteko gai direla erakutsi dute Errenteriakoek. Argi utzi dute mundu osoa kantuz konkistatzeko adina talentu dutela.
