Lain taldeari laguntzeko kontzertua egingo dute etzi Villabonan

Lain musika taldeko kidei entsegu lokalean zituzten musika tresnak eta soinu ekipoa ebatsi zizkieten joan den hilabetean, eta, lapurreta horrek sorrarazi dizkien arazoei aurre egiteko asmoz, taldeko kideek eta beren inguruko lagunek elkartasun kontzertu bat antolatu dute. Etzi izango da, ekainaren 16an, 18:00etan, Villabonako plazan (Gipuzkoa), eta bost taldek hartuko dute parte: Lain, Hesian, Ze Esatek!, Lauroba eta Gugaz. Ze Esatek! taldea ariko da lehenik, eta Gugaz berbena taldearen emanaldiarekin amaituko da jaialdia. Guztira, 12.000 euro inguruko galera izan dute Lain taldeko kideek.