'Lore ta laban'
Taldea: Nakar. Argitaratzailea: egilea editore.
Jone Laspiur (Koban, Nogen), Xalba Ramirez (Raitx, Koban, Physis Versus Nomos), Andoni Olaetxe (Pelax, Zozo, Burrundaria) eta Jokin Azpiazu (OLOR, Occhi di Farfalla, PAM) musikariek 2022an osatu zuten Nakar egitasmoa, eta Lore ta laban hau taldearen estreinako lana da, zeinak post-punkean eta synth-popean iltzatutako bederatzi doinu jasotzen dituen, guztiak programazioetan, sintetizadoreetan eta Laspiurren ahotsean oinarrituak. Laukoteak gora egiten du pasarte ilunenetan; aldiz, argitsuenetan ez da hain sendo azaltzen. Halere, proposamen freskoa da Nakarrena, dantzarako diseinatua, bere estalki elektronikoa tarteko.
