Gorputzean goxo

Esku artean aisa moldatzeko liburu azal-biguna da, tamainaz ertaina (21x17 cm) eta luzera arruntekoa (32 orrialde). Testuak eta ilustrazioak batera doaz, orrialde bakunetan, edo bi orrialdekoetan bestela. Zehazki, testua marrazkiaren gainean ezarrita agertzen da, beti letra beltzez, tamaina eta tipografia mekanografiatu estandarrean.

Izenburuak iradokitzen duen legez, gorputzari buruzko hausnarketa sorta bat eskaintzen zaigu, testua ardatz duela.

Ilustrazioa testuari erantzunez ari da, asmakizunetako gakoak emanez, esku jolasetako pausoak erakutsiz edota testuaren mezuaren interpretazioa eskainiz. Kolore apalak erabili dira, naturalak deritzen horietakoak, batik bat berde eta hori laruak, gorri eta urdin minagoekin jantziak. Oro har, marrazketa garbia da, oinarrizko formetara ekarria, apenas hondorik gabe.

Narrazio laburrak eta hiperlaburrak eskaintzen dira, errimadunak eta poesiaren bestelako baliabideak erabiliz sortuak: hala nola errepikapena, metrika eta paralelismoak. Testu gehienak deskribapenak dira, asmakizun forma hartzen dutenak batzuetan. Emozio atsegina darie guztiei.