Esperientzia geziak

Dibulgazio liburu gutxi argitaratzen dira euskaraz. Eta ez dut ulertzen zergatik. Ematen du eskolako hormetatik irten ezin den kontu bat dela jakintza: han barruan jakintza, hemen kanpoan «ignorantzia»?!! Ez, ez dut ulertzen.

Tristeena da gaur egungo jakintza liburuek ongi pasatzeko tresna perfektuak diruditela, irudi, grafiko, azalpen koadrotxo eta beste hamaika estrategia komunikatibo erabiltzen dutelarik.

Esku artean dugun liburu honek, esaterako, zeharka pizten du zientzia zaletasuna, astronautak fokuan hartuta.

Oinarrizko irakurketa batentzat da egokia, bere orrialde lodi plastifikatuekin, alderik alde irudiak dituztela eta euren gainean azalpenak.

Astronautengan jartzen da fokua, eta tartekaturik eguzki-sistema, izarrak eta galaxiak azaltzen dira. Gutxiengo baten lanbide elitista dela ukatu gabe, haren inguruan espazioari buruz eta astronomiari buruz sortzen den lilura abiapuntu zoragarriak dira, bai naturaren, bai biziaren gaineko galderak barra-barra ernetzeko. Halakoak jendartean zeharka igarotzen diren esperientzia geziak direla ez ahaztu.