EKKO ASTRAL
'Pink Balloons'
Diskoetxea: Topshelf Records.
Pitchfork argitalpen ezagunak oraintsu plazaratu du 2024ko rock diskorik onenen zerrenda, eta Washington DCko Ekko Astral bandaren estreinako grabazio hau lehenengo postuetan kokatu dute erredaktoreek. Egiazki, estatubatuarren lana aparta da, berez bereizten diren horietakoa. Disonantziekin jositako punk-rocka, hardcorearen amorrua, garage-rockaren xalotasuna eta melodiekin esperimentatzeko gogoa uztartzen dituzte queer musikariok, betiere, hitz konprometituak haizatzen dituzten doinuak sortzeko. «Pink Balloons-ek pertsona trans gisa bizi garen eta hilzorian dagoen sistema honetan nabigatzeaz hitz egiten du». Jael Holzman abeslari eta kantuen idazlea.
