BIDELAPURRAK
Batek daki desagertuta egon diren sei urte hauetan Bidelapurrek Aturri ertzetik amari agur esan eta Tenneesseera bidaia egin duten, Robert Johnsonek bezala bidegurutze batean deabruari arima saldu eta gitarra jotzaile birtuoso bihurtuta itzultzeko. Baina nabari da disko hau mimoz ondutakoa dela, gogoz landua, eta horren emaitza birtuoso izatearen parekoa da. Arkatzak zorroztuta eta gitarren sokak estututa, folk doinuak dira nagusi, country eta amerikanaz nahasturik, baina geure lurreko kantagintzaren zipriztinez bustiak, nondik gatozen ahaztu gabe. Hamabi abestitan zehar bidaian garamatza diskoak, inorenak ez diren lurretara, eta amaierara iristean berriro ere hasieratik hasteko gogoa pizten du.
